हेमा भट्ट, श्रावण ३, २०८२
धनगढी उपमहानगरपालिका–४ स्थित होटल सौराइमा सम्पन्न भेलाले सुदूरपश्चिम अटो पार्ट्स व्यवसायीहरूको साझा संगठन “सुदूरपश्चिम अटो पार्ट्स एसोसिएसन” गठन गरेको छ। भेलाले महिन्द्रा एण्ड महिन्द्रा अत्तरिया – शिवम अटो ह्विल्सका संचालक कमल राज ओझालाई सर्वसम्मत रूपमा अध्यक्ष चयन गरेको छ। कमल राज ओझा — जो केवल एक व्यवसायी होइनन्, बरु समाजसेवामा समेत गहिरो छवि बनाइसकेका उद्यमी हुन्।
उनले भने:“हामी सबै बाँच्न चाहन्छौं, तर एक्लै बाँच्न सकिन्न। अब हामी सँगसँगै बाँच्नेछौं — इमानदारी, एकता र सहयोगका साथ।”
व्यवसायिक एकता, मूल्य अनुशासन, ग्राहक सेवा सुधार, र सामाजिक उत्तरदायित्वलाई लक्ष्य बनाउँदै गठन भएको यस संगठनमा निम्न पदाधिकारीहरू चयन भएका छन्:
अध्यक्ष: कमल राज ओझा,उपाध्यक्षहरू दिल्ली राज नेपाली, संजिव कुमार जैन, भिम बहादुर कार्की,सचिव प्रकाश चन्द्र भट्ट, सहसचिव जनकराज बोहरा, कोषाध्यक्ष प्रदीप सिंधल,
र सदस्य नवीन गोयल, रामजी ज्ञवाली, रघुनाथ अवस्थी, लक्ष्मण रिजाल —सबैजना अनुभवी, प्रतिबद्ध र दूरदृष्टि भएका व्यवसायी हुन्।
समितिको पहिलो बैठकमा बोल्दै अध्यक्ष ओझाले भने-हामीलाई एकताले बाँध्ने बेला आएको छ। सुदूरपश्चिमका व्यवसायीहरू अब एकताबद्ध भएर ग्राहकलाई गुणस्तरीय सेवा र सहुलियतमा अटो पार्ट्स उपलब्ध गराउने दिशामा अघि बढ्नेछन्।”
उहाँले विशेष गरी पार्ट्सका लागि बुटवल र काठमाडौंबाट निर्भर हुनुपर्ने बाध्यतालाई अन्त्य गर्दै धनगढीलाई नै अटो पार्ट्स आपूर्तिको केन्द्र बनाउने योजना सार्वजनिक गरे।
साथै, उधारो प्रथाले साना व्यवसायीलाई पर्ने भार, मूल्य असमानता, र प्रतिस्पर्धाको अराजकता अन्त्य गर्ने, र संगठनमार्फत व्यवसायीबीच पारदर्शिता र सहयोगको भावना विकास गरिने प्रतिबद्धता व्यक्त गरे।
समाजप्रतिको उत्तरदायित्वबोधका साथ, संकलित कोषबाट विपन्न, अपाङ्ग, टुहुरा तथा असहायलाई सहयोग गरिने योजनासमेत अगाडि सारिएको छ। क्त भेलामा कैलालीका अत्तरिया र धनगढीका व्यवसायीहरूको सहभागिता थियो। सहभागीहरूले संगठनको गठनलाई इतिहासमै पहिलो सुदृढ व्यवसायिक समितिका रूपमा व्याख्या गरे।
सुदूरपश्चिम अटो पार्ट्स एसोसिएसनको गठनसँगै यहाँको अटो व्यवसाय क्षेत्र अब संगठित, उत्तरदायी र भविष्यमुखी दिशातर्फ अघि बढ्ने अपेक्षा गरिएको छ।
