धनगढी — चाडपर्व नजिकिँदै गर्दा सुदूरपश्चिमका सरोकारवालाहरूले नेपाली मौलिक कला र संस्कृतिको संरक्षण गर्न विशेष जोड दिएका छन्।
धनगढी उपमहानगरपालिका–३ स्थित शुभकामना टोल विकास समितिले धनगढी प्रज्ञा सदनको प्राङ्गणमा हरितालिका तीजको अवसरमा आयोजना गरेको तीज मिलन कार्यक्रममा सहभागीहरूले सांस्कृतिक संरक्षणमा सबैको सक्रियता आवश्यक रहेको बताएका हुन्।
कार्यक्रमका प्रमुख अतिथि सुदूरपश्चिम प्रज्ञा प्रतिष्ठानका उपकुलपति डा. टीएन जोशीले मौलिक कला र संस्कृतिको संरक्षणका लागि सबैले हातेमालो गर्नुपर्नेमा जोड दिए। उनले पछिल्लो समय तीज जस्ता पर्वहरूमा फैलिएको विकृति रोक्न र उच्छृङ्खल गीतहरूको बहिस्कार गर्नुपर्ने बताए।
वडा नम्बर ३ का वडाध्यक्ष राजबहादुर ऐरले पनि यस्तो कार्यक्रमले संस्कृतिको संरक्षणमा महत्वपूर्ण भूमिका खेल्ने बताए र टोल विकास समितिलाई सहयोग गर्ने प्रतिबद्धता व्यक्त गरे।
कार्यक्रमका सभापति तथा टोल विकास समितिका अध्यक्ष दिर्घराज ओझाले महिलाहरूलाई सामूहिक रूपमा भेटघाट गराएर तीजको महत्व बुझाउने उद्देश्यले यो कार्यक्रम आयोजना गरिएको बताए। उनले तीज पर्वलाई सभ्य र मर्यादित तरिकाले मनाउनुपर्ने सन्देश दिन खोजिएको पनि बताए।
कार्यक्रममा टोलका ८० वर्षमाथिका ११ जना वयोवृद्धलाई सम्मान गरिएको थियो भने आर्थिक सहयोग गर्ने ६ दातालाई प्रमाणपत्रसहित सम्मान प्रदान गरिएको थियो।
धनगढी प्रज्ञा सदनका विद्यार्थीहरूको तीज नृत्य र टोलबासी महिलाहरूको सांस्कृतिक प्रस्तुति कार्यक्रममा समावेश थिए।
कार्यक्रममा टोलबासी, विभिन्न टोल विकास समितिका अध्यक्ष तथा प्रतिनिधिहरूको उपस्थिती रहेको थियो। स्वागत मन्तव्य पद्मा मडैले राखिन् भने कार्यक्रम सञ्चालन सचिव रुपराज रेग्मीले गरेका थिए।
