गणेश क्षेत्री
कैलालीको लम्किमा रहेको इलाका प्रहरी कार्यालयले आर्थिक वर्ष २०८१/८२ मा सबैभन्दा धेरै बैंकिङ कसुर अन्तर्गत ३२ जनालाई पक्राउ गरेको छ।
इन्चार्ज लोकेन्द्रबहादुर सिंहका अनुसार सो अवधिमा लागुऔषध कारोबार तथा सेवनमा संलग्न २२ जना, जबर्जस्ती करणीमा ९ जना, कर्तव्य ज्यान मुद्दामा ३ जना, सवारी ज्यान मुद्दामा १२ जना र चोरीमा संलग्न ५ जनालाई पक्राउ गरिएको छ।
उनले पूर्व–पश्चिम राजमार्ग भएकाले लम्कि क्षेत्रलाई संवेदनशील मानिएको बताउँदै, “घटना नघटाओस् भन्ने हाम्रो पहिलो प्राथमिकता हो, तर घटना घटिहाले अपराधी उम्किन नपाउने गरी कानुनी राज्यको प्रत्याभूति गराउँछौं,” भने।
स्थानीय समाजसेवी तथा व्यापारी सन्तोष सापकोटाले लम्कि क्षेत्रमा यस वर्ष ९ वटा बलात्कारका घटना घट्नु दुर्भाग्यपूर्ण भएको उल्लेख गर्दै, “हाम्रो सभ्य समाज भन्ने नारा किताबमै सीमित भएको छ, सुधार आवश्यक छ,” भने।
यसैबीच, इलाका प्रहरीले आपराधिक क्रियाकलाप न्यूनीकरणका लागि विद्यालय–विद्यालयमा गएर जनचेतनामूलक कार्यक्रम सञ्चालन गर्दै आएको छ। साथै, अभिभावकसँग विभिन्न समयमा छलफलसमेत गरिँदै आएको स्थानीय टोपबहादुर डाँगीले जानकारी दिए।
