धनगढी – बहुउद्देश्यीय विकास समाज (MPDS), डडेल्धुराको आयोजनामा बाढी तथा पहिरो प्रभावित जनताका लागि आपतकालीन अवस्थामा सहयोग गर्न पूर्व तयारी तथा प्रतिकार्य परियोजनाको शुभारम्भ अभिमुखीकरण गोष्ठी भजनी नगरपालिकामा सम्पन्न भएको छ।
भजनी नगरपालिकासँगको समन्वय र कियाको सहयोगमा आयोजना गरिएको सो कार्यक्रम परियोजनाको तेस्रो चरणअन्तर्गत सञ्चालन गर्न लागिएको हो। गोष्ठीमा स्थानीय सरोकारवाला निकायलाई परियोजना वारे जानकारी दिई समन्वय तथा सहकार्यको माध्यमबाट गतिविधि प्रभावकारी ढंगले कार्यान्वयन गर्ने उद्देश्य राखिएको थियो।
कार्यक्रममा परियोजना संयोजक शिवराज पाठकले प्रस्तुति दिँदै भजनी क्षेत्रमा पूर्वतयारीका लागि जनचेतनामूलक कार्यक्रम, बाढी प्रभावितलाई राहत सामग्री वितरण, जोखिम नक्सांकन तथा सर्वेक्षण, विपद सामग्री सहयोग, पूर्वसूचना प्रणाली अभिमुखीकरण, टास्क फोर्स तथा सामुदायिक अगुवालाई आत्मरक्षा तालिम, वृक्षारोपण र बायो–इञ्जिनियरिङ कार्य सञ्चालन गरिने जानकारी गराए।
भजनी नगरपालिका प्रमुख केवल चौधरीले अघिल्लो वर्ष पनि MPDS ले विपद व्यवस्थापनमा प्रशंसनीय काम गरेको भन्दै यस परियोजनाले जोखिम न्यूनिकरणमा महत्त्वपूर्ण योगदान पुर्याउने विश्वास व्यक्त गरे। उनले स्थानीय सरकारको तर्फबाट पूर्ण सहयोग रहने प्रतिवद्धता जनाए।
कार्यक्रममा वडा नं. १ का अध्यक्ष धर्मेन्द्र श्रेष्ठ, वडा नं. ३ का अध्यक्ष विक्रम चौधरी, वडा नं. ९ का अध्यक्ष सञ्जीव चौधरी, निमित्त प्रमुख प्रशासकीय अधिकृत कैलाश चौधरी, प्रशासन तथा सूचना अधिकारी चन्द्रदेव भट्ट, वन वातावरण तथा विपद व्यवस्थापन शाखा प्रमुख विष्णु न्यौपाने लगायतले मन्तव्य राखेका थिए।
गोष्ठीको अध्यक्षता नगर प्रमुख एवम् पालिका स्तरीय विपद व्यवस्थापन मूल समितिका संयोजक केवल चौधरीले गरेका थिए।
