हेमा भट्ट,
कञ्चनपुर, साउन २८ – कृष्णपुर नगरपालिका–३ का बासिन्दाहरूका लागि आजको दिन ऐतिहासिक रह्यो। दशकौंसम्म सानो र अस्थायी भवनमा काम चलाउँदै आएका उनीहरूले आज देखे—आफ्नो सपना ईँटा–सिमेन्टको रूप लिन थालेको। वर्षौंदेखि सीमित स्थान, पुराना संरचना र असुविधासँग जुद्दै आएका बासिन्दाहरूले अब आधुनिक र व्यवस्थित भवनबाट सेवा पाउने निश्चितता पाए।
७१ लाख ५० हजार २ सय ४ रुपैयाँ २८ पैसा लागतमा निर्माण हुन लागेको नयाँ प्रशासनिक भवनको शिलान्यास नगर प्रमुख हेमराज ओझाले विशेष समारोहका बीच गरे। नगर प्रमुख ओझाले समारोहमा उपस्थित सबैलाई सम्बोधन गर्दै भने, “यो भवन केवल कार्यालयको संरचना होइन, यो जनताको विश्वास, पारदर्शिता र सेवा सहज बनाउने माध्यम हो। हामी गुणस्तर र समयसीमा दुवैमा सम्झौता नगरी निर्माण सम्पन्न गर्ने प्रतिबद्धता व्यक्त गर्छौं।”
कार्यक्रममा वडा नं. ३ का वडाध्यक्ष खेम चौधरी, वडा सदस्यहरू, समाजसेवी बलराम पन्त, स्थानीय बुद्धिजीवी तथा नगरवासीहरूको उपस्थितिले समारोहलाई अझ उत्साहपूर्ण बनाएको थियो। वडाध्यक्ष चौधरीले भने, “पहिले सानो भवनमा काम चलाउँदा सेवा प्रदान गर्न चुनौती हुन्थ्यो। अब यो नयाँ भवनले वडा कार्यालयको सेवा व्यवस्थित, छिटो र जनमैत्री बनाउनेछ। यो भवन हाम्रो वडाको गौरव बन्नेछ।”
भवन निर्माण कार्यको जिम्मा गोदावरी–१, अत्तरिया, कैलालीस्थित श्रीषा एण्ड समायारा कन्स्ट्रक्सन प्रा.लि.ले ठेक्का नं. ३०–२०८१/८२ अन्तर्गत पाएको छ। निर्माण कार्य २०८२ चैत ३० भित्र सम्पन्न हुने लक्ष्य राखिएको छ।
स्थानीयवासीहरूले नयाँ भवनले दिने सुविधाप्रति ठूलो आशा व्यक्त गरेका छन्। उनीहरूले बताए, वर्षा वा भीडभाडको कारणले सेवा ढिलाइ हुने समस्या अब अन्त्य हुनेछ। एक वृद्ध बासिन्दाले भावुक हुँदै भने, “हामीले धेरै वर्ष सानो भवनमा सेवा लिनुपरेको थियो। आजको शिलान्यास हाम्राे पहिलो कदम हो। अब हाम्रो बच्चा–बच्चीहरूले व्यवस्थित सेवा पाउनेछन्।
समारोहमा उपस्थित सबैले भवनलाई केवल प्रशासनिक आवश्यकता पूरा गर्ने संरचना मात्र नभई—विकासको प्रतीक, स्थानीय पहिचान र आत्मगौरवको संरचना रूपमा हेरिरहेका थिए। नगर प्रमुखको प्रतिबद्धता, वडाध्यक्षको दृढता र स्थानीयबासिको सक्रिय सहयोगले यो भवन समयमै र गुणस्तरीय बन्ने विश्वास सबैले व्यक्त गरे।
नयाँ भवनको शिलान्यासले केवल प्रशासनिक कामकाजलाई सहज बनाउने छैन, यसले स्थानीय बासिन्दामा विकास र आत्मनिर्भरता प्रति विश्वास जगाउनेछ। सानो भवनबाट सुरु भएको यात्रा अब आधुनिक संरचना, पारदर्शिता र दक्ष सेवा प्रदान गर्ने भवनमा परिणत हुँदैछ—कृष्णपुर–३ का लागि विकासको नयाँ बिहान ल्याउने मार्गचित्र बनेको छ।
