धनसिंह धामी, २९ साउन
कञ्चनपुर -सरकारको विद्यालय शिक्षा ऐनका विवादास्पद प्रावधानलाई अन्यायपूर्ण ठहर गर्दै निजी विद्यालय सञ्चालकहरू सडकदेखि संसदसम्म दबाब सिर्जना गर्ने तयारीमा उत्रिएका छन्। प्याब्सन र एन–प्याब्सनको संयुक्त नेतृत्वमा सुरु भएको यो आन्दोलन ‘शिक्षा सुधारको नाममा शिक्षा नाश गर्न नदिने’ दृढ संकल्पसँग अघि बढेको छ।
संघीय संसदको शिक्षा, स्वास्थ्य तथा सूचना प्रविधि समितिबाट पारित विधेयकमा निजी विद्यालयलाई क्रमशः गैर–नाफामूलक बनाउने, पूर्ण छात्रवृत्ति दिने लगायतका बुँदा राखिएको छ। सञ्चालकहरूका अनुसार, यो व्यवस्था शिक्षा क्षेत्रमा लगानी, प्रतिस्पर्धा र गुणस्तरको धराशायी गर्ने षड्यन्त्र हो।
प्याब्सन कञ्चनपुरका अध्यक्ष महादेव भट्टले भने, “यो ऐन लागू भए निजी विद्यालयको अस्तित्व नै समाप्त हुन्छ। हामी चाहन्नौँ कि विद्यार्थीको भविष्य राजनीतिक प्रयोगशालामा परोस्।” उनका अनुसार पहिलो चरणमा जिल्लाका सबै नौवटा पालिकामा मेयर र शिक्षा शाखा प्रमुखलाई ज्ञापनपत्र बुझाएर आन्दोलनको बिगुल फुकिएको छ।
एन–प्याब्सन कञ्चनपुरका अध्यक्ष सत्येशबहादुर चन्दले राज्यले बारम्बार निजी विद्यालयमाथि अन्याय गर्दै आएको स्मरण गर्दै भने, “गुणस्तरको शिक्षा दिनेलाई दण्ड दिने हो भने, हामी चुप लागेर बस्दैनौं।”
प्याब्सन भीमदत्त नगरका अध्यक्ष उपेन्द्रप्रसाद जोशीको चेतावनी स्पष्ट छ— विधेयकका प्रावधान हटाए मात्र हामी फर्किन्छौं, नत्र विद्यालय बन्दसम्म जान्छौं।
निजी विद्यालयलाई गैर–नाफामूलक बनाउने प्रावधान खारेज
‘पूर्ण छात्रवृत्ति’ भन्ने शब्द हटाएर हालको १०% प्रावधान कायम
भर्ना, शुल्क, वार्षिक शुल्क र मासिक शुल्कमा निरन्तरता
प्याब्सनका केन्द्रीय सदस्य अम्मराज भट्टले भने, “समयमै सहमति भएन भने, हामी कलम राखेर ताल्चा मार्न बाध्य हुन्छौं। जिम्मेवारी सरकारकै हुनेछ।”
आन्दोलनका चरणहरू
१. साउन २९ – पालिकास्तरमा मेयर र शिक्षा शाखा प्रमुखलाई ज्ञापनपत्र बुझाउने
२. साउन ३० – जिल्ला प्रशासन कार्यालय र शिक्षा निकायलाई ज्ञापनपत्र बुझाउने
३. भदौ १ – प्रदेश सरकारका मुख्यमन्त्री र सामाजिक विकास मन्त्रालयमा ज्ञापनपत्र
४. भदौ २ – संघीय सांसदलाई ज्ञापनपत्र
५. भदौ २ – राष्ट्रिय परिषदको जूम बैठकमार्फत सुझाव संकलन
६. भदौ २ – पालिकास्तरीय आन्दोलन तयारी बैठक
७. भदौ ४ – जिल्लास्तरीय आन्दोलन तयारी बैठक
८. भदौ ५ – प्रदेशस्तरीय आन्दोलन तयारी बैठक
९. भदौ ६–७ – केन्द्र र प्रदेशस्तरमा सरोकारवालासँग अन्तरक्रिया
