कञ्चनपुर – शुक्लाफाँटा नगरपालिकाको नगर गौरवको योजना अन्तर्गतको चक्रपथको उत्तरतर्फ पर्ने वनसमिति–कसरौल सडक अहिले यात्रुका लागि डरको गल्छी बनेको छ। सडकको दायाँबायाँ उभिएका सुकेका साल र असनाका जीर्ण रुखहरू जुनसुकै क्षण खस्नसक्ने अवस्थामा छन्। पैदल हिँड्दै होस् वा गाडीमा चढ्दै, प्रत्येक कदममा मृत्युको छायाँ पछ्याइरहेको छ।
यो खतरा केवल अनुमान होइन, भोगिएको यथार्थ हो। केही वर्षअघि यही सडकमा ६० वर्षीय फिरुवा रानाको टाउकामाथि सुकेको रुखको हाँगा खसेर ज्यान गुम्यो। विद्यार्थी बोकेको विद्यालय बसमाथि रुख खस्दा चमत्कारकै भरमा बालबालिका बाँच्न सफल भए। कसैको गोठमाथि रुख खस्यो, कसैको घरको कुनो भाचियो—भाग्यले मात्र मानवीय क्षति टर्यो।
पूर्ववडाध्यक्ष जगता रानाका अनुसार, हावाहुरी, चट्याङ र वर्षात्को समयमा यो सडक प्रयोग गर्नु भनेको ज्यान हत्केलामा राख्नु हो। वैकल्पिक बाटो नभएकाले स्थानीयहरू बाध्यतावश यतै हिँड्छन्। तर प्रत्येक वर्षा र हावाहुरीले यो बाटो मृत्युको जालझैँ देखिन्छ।
स्थानीय जहरसिंह रानाले चेतावनी दिए, “रुख कहिले खस्छ, कुन टाउकामाथि पर्छ—कसैले भन्न सक्दैन। हामी वर्षात् र हावाहुरीका बेला यो बाटो छाड्छौँ।”
सडक छेउका जीर्ण रुखहरू तत्काल हटाइएन भने, अर्को दुर्घटना केवल समयको कुरा हो। आजै कदम चाल्ने कि भोलि दुखद खबर सुन्ने—यो निर्णय अब सम्बद्ध निकायकै हातमा छ।
