साउन ३० धनगढी
माग अनुसारको उत्पादन नहुँदा तरकारीमा परनिर्भरता बढ्दै गएको छ । निर्यात न्युन रहेको कैलाली भन्सार कार्यालयबाट तरकारीको आयात बढ्दै गएको हो ।
कैलाली भन्सार कार्यालयबाट गत आर्थिक बर्ष २०८१/८२ मा ३८ करोड ६५ लाख ६९ हजार मूल्यको आलुमात्रै भारतबाट आयात भएको कार्यालयका सूचना अधिकारी खिमप्रसाद अर्यालले जानकारी दिए ।
उनका अनुसार गत आवमा २ करोड ७३ लाख ३४ हजारको टमाटर,१२ करोड ५५ लाख ९२ हजारको प्याज,२ करोड ३१ लाख २७ हजारको सुकेको चना र १ करोड २१ लाख ६७ हजारको सुकेको सिमी आयात भएको छ ।
त्यस्तै, ६२ लाख ४२ हजारको मटर,४२ लाख ८३ हजारको बन्दा,२९ लाख ६४ हजारको गाजर,११ लाख २२ हजारको काँक्रो र २ लाख ८२ हजारको काउली/ब्रोकाउली आयात भएको उनले जानकारी दिए ।
त्यस्तै,६१ लाख ८ हजारको फर्सी/लौका तथा १ करोड ३५ लाख ६१ हजारको अन्य तरकारी आयात भएको कार्यालयको तथ्यांक छ । सरकारले किसानलाई प्रोत्साहन गर्न विभिन्न कार्यक्रम सञ्चालन गर्दै आएको भएपनि उत्पादन बढ्न सकेको छैन् ।
आयात वर्षेनी बढ्दै गएको भएपनि कैलाली भन्सार कार्यालयबाट निर्यात भने नगण्य मात्रामा हुने गरेको छ । पछिल्ला केही वर्ष यता भन्सार कार्यालयले लक्ष्यअनुसारको राजस्व समेत संकलन गर्न सकिरहेको छैन् ।
गत आवमा पनि कार्यालयको राजस्व संकलन लक्ष्यमा पुग्न सकेको थिएन् । गत २०८१/८२ मा कार्यालयको ११ अर्ब १६ करोड २६ लाख राजस्व सङ्कलनको वार्षिक लक्ष्य रहेकामा आठ अर्ब ६६ करोड ९८ लाखमात्रै राजस्व सङ्कन भएको सूचना अधिकारी अर्यालले जानकारी दिए । जुन वार्षिक लक्ष्यको ७७ दशमलव ६७ प्रतिशतमात्रै रहेको थियो ।
