हेमा भट
कञ्चनपुर, ३० साउन २०६२ – “संसारका मजदुर हो, एक हौ!” नाराले गुन्जिएको भीमदत्तनगर आज लाल झण्डामुनि एकताबद्ध भयो। नेपाल कम्युनिष्ट पार्टी (माओवादी केन्द्र) भीमदत्तनगर समितिको दोस्रो नगर अधिवेशन, पार्टीका वरिष्ठ उपाध्यक्ष तथा पूर्वगृहमन्त्री माननीय नारायणकाजी श्रेष्ठ (क. प्रकाश) को प्रमुख आतिथ्यमा भव्य र जोशपूर्ण रूपमा सम्पन्न भयो।
अधिवेशनले ८ पदाधिकारीसहित ४९ सदस्यीय नगर समिति सर्वसम्मत रूपमा चयन गर्दै ऐतिहासिक जिम्मेवारी प्रदान गरेको छ। अधिवेशनमा पारित ७ बुँदे क्रान्तिकारी प्रस्तावमा— भ्रष्टाचार र अन्यायको विरुद्ध जनजागरण, भूमिहीन र पीडित समुदायको हकहितको रक्षा, किसानलाई समयमै मल–बीउको आपूर्ति, प्राकृतिक विपत्तिपीडितको सुरक्षाको प्रत्याभूति, सीमामा सर्वसाधारणमाथि हुने हैरानीको अन्त्य, तथा लैंगिक हिंसा, जातीय विभेद र लागुऔषधको विसंस्कृति विरुद्ध निरन्तर संघर्ष—जस्ता मुद्दाहरूलाई अडानका साथ अघि बढाउने घोषणा गरिएको छ।
अधिवेशनले स्पष्ट चेतावनी दियो— “भ्रष्टाचारमा लिप्त यो शोषणकारी सरकारलाई अब जनताको क्रान्तिकारी शक्तिले चुनौती दिनेछ।” मजदुर, किसान, भूमिहीन, दलित, शिक्षक, विद्यार्थी, बुद्धिजीवीदेखि सर्वसाधारण जनसमुदायसम्म सबैलाई माओवादी केन्द्रको झण्डामुनि गोलबन्द भई नयाँ जनयात्रा अगाडि बढाउन आव्हान गरिएको छ।
लाल झण्डा फर्फराउँदै, नाराहरू गुञ्जाउँदै भीमदत्तनगरको आकाशमा क्रान्तिको स्वर फेरि एकपटक प्रज्वलित भयो।
