साउन ३१ धनगढी
जिल्लाको कृष्णपुर नगरपालिका–२ मछेली दोदा नदीको किनारमा बसेका ५ घरपरिवारका सुकुम्बासी रोग,भोक र बाढीको त्रासमा बाँचिरहेका छन् । करिब १८ बर्षदेखि सरकारको उचित व्यवस्थापनको पर्खाइमा बसेका ५ परिवारका १९ जना सुकुम्बासी रोग,भोक र बाढीको त्रासमा बाँचिरहेका हुन् ।
उनीहरु पूर्ण सुकुम्बासी भएको बताउँछन् । नदीको छेउमा बसेका उनीहरुको जीवन कष्टपूर्ण वितिरहेको छ । बर्षातको समयमा कतिखेर नदीमा आएको बाढीले बगाउने भन्ने चिन्ताले सताउने गरेको सुग्नी डगौराले बताइन् ।
‘बर्षातको समय घरको छानोबाट पानी चुहिन्छ,नदीमा बाढी आउँछ घरसम्मै पुग्छ कि भन्ने चिन्ता लाग्छ’, उनले भनिन् ‘हाम्रो समस्या सरकारले कहिले बुझिदिने हो ? सर्पले त्यत्तिकै सताउँछ, लामखुट्टेको टोकाइबाट रातभर सुत्न सकिदैन ।’
उनले दुःखेसो गर्दै भनिन् ‘सरकारले हाम्रो उचित व्यवस्थापन किन गरिरहेको छैन ? पढाउने उमेरमा २२ बर्ष को छोरा कालु डगौराको शरीर पूरै सुनिने रोग लागेको छ ।’ महिनाको एकचोटी उपचारका लागि अस्पताल लैजाने गरेको उनले बताइन् । उनले भनिन् ‘उपचार खर्चको अभाव छ । हामीलाई कसैले पनि हेर्दैन । कृष्णपर नगरपालिकाबाट आउँछन्,हेर्छन जान्छन्, व्यवस्थापनको कुरा कसैले पनि गर्दैनन् ।’
‘सरकारलाई हामी जस्ता नागरिकको किन चिन्ता लाग्छ वडामा गयो ढुक्कले बस भन्छ । भोट हाल्ने बेला नमस्कार भनेर रिक्सा लिएर आउँछन् । हामीलाई समस्या पर्दा हेर्दैनन्’, सोही ठाउँकी मागी बिष्ट डगौराले भनिन् ।
उनले भनिन् ‘बर्षातको समयमा एउटा झुल समेत दिँदैनन् । बालबालिका ठूला भइसके उनीहरुको पढाइलेखाइ गर्नका लागि खर्च जुटाउने की खानका लागि जोहो गर्ने दिनभरी काम गर्नु पर्छ । के छ तपाइहरुको समस्या भनेर कोही पनि आउँदैनन् ।’ बाढी आउँदा नदी घरसम्मै पुग्ने गरेको उनले बताइन् । जंगलबाट काठ ल्याउँदा किन ल्याएको भनेर सोधखोज गर्न आउने गरेको उनले बताइन् ।
सोही ठाउँकी कलाकन्द रानाले सरकाले आफूहरुजस्ता सुकुम्बासीको उचित व्यवस्थापन गर्नुपर्ने बताइन् । यसरी जीवन बाच्न नसकिने उनको भनाइ छ । ‘नर्कको जीवन बाँचिरहेका छौँ । । सरकार कहाँ र कस्को लागि छ थाह छैन ? उसरी त सरकार हामी जस्ता नागरिकका लागि हो नि’ उनले भनिन् ‘तर यत्तिका बर्ष हुँदा पनि हामी जस्ता नागरिकका लागि सरकारले केही पनि गरेन ।’
कृष्णपुर नगरपालिकाका नगरप्रमुख हेमराज ओझाले नदीमा आएको बाढीबाट जोगाउन तटबन्धन गरिदिएको बताए । उनले भने ‘पटक–पटक गएर सहयोग पनि गरेका छौँ । मेरो आफ्नै पहलमा विद्युत पनि जडान गरिएको छ ।’
जग्गा प्राप्तीका लागि रातो फाराम भर्न भनेको र फेरि एकपटक गएर बुझ्ने उनले बताए । उनीहरुको समस्या बुझेर नै नगरपालिकाको पहलमा पटक–पटक गएर खाद्य सामाग्री उपलबध गराउँदै आएको उनको भनाइ छ । सुकुम्बासीको उचित व्यवस्थापनका लागि पहल भइरहेको उनले बताए । साभार निशान न्युज
