भदौ ०१ धनगढी ।
डोटीको जोरायल गाउँपालिका वडा नं. ५ को कार्यालय गाउँबाट सहर आएर आफ्ना नागरिकलाई सेवा दिन थालेको छ । वडा कार्यालयले कैलालीका विभिन्न ठाउँमा बस्ने आफ्ना वडाका नागरिकलाई शिविरमार्फत सेवा दिन थालेको हो ।
गत साउन २९ र ३० गते कैलालीको धनगढीमा शिविर सञ्चालन गरि सेवा जेष्ठ नागरिक लाभग्राहीको सामाजिक सुरक्षा परिचयपत्र बायोमेट्रिक विधिबाट नवीकरण गरिएको वडा कार्यालयका सचिव विनोद रजवारले जानकारी दिए ।
सो शिविरबाट ६० जना जेष्ठ नागरिक लाभग्राहीको बायोमेट्रिक विधिबाट सामाजिक सुरक्षा परिचयपत्र नवीकरण गरिएको उनले जानकारी दिए ।
उनले सडक बिग्रिएको हुँदा गाडी नचल्ने र गाउँसम्म जान वृद्धवृद्धालाई अप्ठ्यारो हुने भएकाले यही आएर सेवा दिन थालिएको बताए ।
गाउँपालिकाको पञ्जीकरण शाखाको सहजिकरणमा शिविर सञ्चालन भइरहेको र भदौ २ गते अत्तरियामा शिविर सञ्चालन गरिने उनले जानकारी दिए ।
सहरमा बसेकालाई खोजिखोजी वडा कार्यालयले सेवा दिँदा वृद्धवृद्धालाई धेरै सजिलो भएको जोरायल गाउँपालिका–५ गडसेराका स्थानीय रविन्द्र देउवाले बताए । उनले भने ‘यो वडा कार्यालयको राम्रो काम हो । यसले जेष्ठ नागरिकलाई एकदमै सजिलो भएको छ ।’ साभार निशाना न्युज
