हेमा भट्ट,
कञ्चनपुर-कृष्णपुर नगरपालिका–२ बंक क्याम्पस चोकस्थित गौरा देवी मन्दिर परिसरमा यस वर्षको गौरा पर्व भब्य र सभ्यतापूर्वक मनाउने तयारी अन्तिम चरणमा पुगेको छ। गौरा मूल समितिले नगरपालिकालाई औपचारिक जानकारी गराएपछि नगर प्रमुख हेमराज ओझा र वडा नम्बर २ का वडा अध्यक्ष अर्जुन साउदको प्रत्यक्ष संलग्नतामा सरसफाइदेखि मैदान व्यवस्थापनसम्मका काम तीव्र बनेका छन्।
नगर प्रमुख हेमराज ओझाले स्थानीयवासीको सक्रिय सहयोग र नगरपालिकाको स्रोत साधन प्रयोग गरी सरसफाइ, पानी पिच तथा पूर्वाधार व्यवस्थापन भइरहेको जानकारी दिए। उनका अनुसार सुदूरपश्चिम प्रदेशको प्रथम स्थलगत गौरा पर्व स्थलका रूपमा चिनिने कृष्णपुरको यो मैदानमा भदौ १५ गते उद्घाटन कार्यक्रम आयोजना हुनेछ भने भदौ १६ गतेदेखि विभिन्न प्रतियोगिता, सांस्कृतिक तथा धार्मिक कार्यक्रम सुरु हुनेछन्। ओझाले गौरा पर्वलाई नमुना बनाउन नगरपालिकाले विशेष प्राथमिकता दिएको बताए।
“सामुदायिक सहभागिता बिना यस्ता ठूलो पर्व सम्भव हुँदैन। स्थानीयवासीले गरेको श्रमदान र सहकार्यका कारण यसपटकको गौरा पर्व अझ व्यवस्थित हुने छ,” — नगर प्रमुख ओझाले भने।
वडा अध्यक्ष अर्जुन साउदले बर्षा हुँदा मैदान हिलाम्मे हुने समस्या समाधानका लागि अग्रिम तयारी थालिएको बताए। उनका अनुसार वडा सदस्यको नेतृत्वमा मुल समिति गठन गरी सरसफाइ अभियानलाई व्यापक बनाइएको छ। साथै उदय माध्यमिक विद्यालय एनसीसी व्यवस्थापन समिति, स्थानीय संघसंस्था र सहयोगी दाताहरूको हातेमालोले मैदान तथा वरपरका क्षेत्रलाई व्यवस्थित बनाउन काम भइरहेको छ।
“गौरा पर्व हाम्रो धार्मिक विश्वास मात्र नभई सामुदायिक एकताको प्रतीक हो। यो पर्वलाई सुरक्षित, स्वच्छ र व्यवस्थित बनाउन वडावासी पूर्ण प्रतिबद्ध छन्,” — वडा अध्यक्ष साउदले भने।
गौरा मूल समितिका अनुसार यस वर्षको पर्वमा दैनिक करिब १० हजार जनाको उपस्थिति रहने अनुमान गरिएको छ। अत्तरिया बजारदेखि करिब १३ किलोमिटर पश्चिम राजमार्ग नजिकै पर्ने गौरा खेलमैदानमा धार्मिक अनुष्ठानसँगै विविध सांस्कृतिक कार्यक्रम हुनेछन्। विभिन्न राष्ट्रिय कलाकारहरूले प्रस्तुत गर्ने कार्यक्रम विशेष आकर्षण हुने समितिले जनाएको छ। साथै उत्कृष्ट कलाकारलाई सम्मान गर्ने तयारी पनि गरिएको छ।
सुदूरपश्चिमको गौरव पर्वका रूपमा रहेको गौरा पर्वलाई यसपटक नमुना पर्वका रूपमा प्रस्तुत गर्ने लक्ष्य राखिएको छ। नगरपालिकाको दक्षिणतर्फ लालझाडी गाउँपालिका, उत्तरतर्फ चुरे गाउँपालिका र पर्शुराम नगरपालिका, पूर्वतर्फ धनगढी उपमहानगरपालिका र गोदावरी नगरपालिका तथा पश्चिमतर्फ शुक्लाफाँटा नगरपालिकाले घेरेको यस क्षेत्रलाई धार्मिक र सांस्कृतिक केन्द्रको रूपमा चिनाउने उद्देश्यसमेत आयोजक समितिले लिएको छ।
धार्मिक आस्था, सामुदायिक मेलमिलाप र सांस्कृतिक विविधताको संगमका रूपमा रहेको गौरा पर्वलाई यस वर्ष अझै व्यवस्थित र भब्य बनाउन नगरपालिकादेखि स्थानीयबासीसम्म एकजुट भएर जुटिरहेको देखिन्छ।
