हेमा भट्ट, भदौ २, २०८२,
धनगढी, कैलाली – राष्ट्रिय मानव अधिकार आयोग, सुदूरपश्चिम प्रदेश कार्यालयमा आज राष्ट्रिय अपाङ्ग महासंघ–नेपाल र अपाङ्गता क्षेत्रमा काम गर्ने विभिन्न गैरसरकारी संस्थाका प्रतिनिधिहरूबीच अपाङ्गता अधिकार सुनिश्चितका लागि विशेष छलफल सम्पन्न भयो।
छलफलमा Convention on the Rights of Persons with Disabilities, 2006, नेपालको संविधान तथा संघ, प्रदेश र स्थानीय तहका कानूनमा उल्लेखित अपाङ्गता अधिकारको कार्यान्वयन र सरोकारवालाबीच सहकार्य सुदृढ पार्ने उपायमा केन्द्रित चर्चा भएको थियो।
सहभागीहरूले शिक्षा, स्वास्थ्य, रोजगारी, सामाजिक सुरक्षा र पहुँचयोग्यता सम्बन्धी चुनौतीहरूको विषय उठाउँदै सरकारी निकाय, गैरसरकारी संस्था र नागरिक समाजबीच अनुभव साटासाट, साझा रणनीति निर्माण र दीगो पहलमार्फत अपाङ्ग व्यक्तिहरूका अधिकार सुनिश्चित गर्नुपर्नेमा जोड दिएका थिए।
राष्ट्रिय मानव अधिकार आयोग, सुदूरपश्चिम प्रदेशका पदाधिकारीले अपाङ्ग व्यक्तिहरूको अधिकार संरक्षणमा आयोगको प्रतिबद्धता व्यक्त गर्दै सबै सरोकारवालासँग सहकार्य निरन्तर आवश्यक रहेको बताए।
गैरसरकारी संस्थाका प्रतिनिधिहरूले समुदायमा चेतना अभिवृद्धि, पहुँचयोग्य वातावरण निर्माण र नयाँ पहल कार्यान्वयनको आवश्यकता औँल्याए। आयोजकहरूले यस छलफलले साझा रणनीति निर्माण र सरोकारवालाबीच सहकार्य थप मजबुत बनाउने अवसर प्रदान गरेको बताए।
