हेमा भट्ट , भदौ ४
कञ्चनपुर, भाद्र ३ – कृष्णपुर नगरपालिका–९, घाेडाघाट, कञ्चनपुरस्थित सिता सामुदायिक वन उपभोक्ता समूहले आफ्नो आठौं वार्षिक साधारण सभा आगामी भाद्र १४ गते बिहान ११ बजे आयोजना गर्ने भएको छ।
समूहले जारी गरेको औपचारिक सूचनामा भनिएको छ कि सभा पानी नपरेको अवस्थामा समूहको कार्यालय प्राङ्गणमा हुनेछ भने वर्षा भएमा नजिकैको शिव दुर्गा मन्दिरको सभाहलमा स्थानान्तरण गरिनेछ।
सभामा समूहले विगत वर्षका गतिविधिहरूको विस्तृत समीक्षा गर्दै विधानअनुसारका आगामी कार्यक्रम र नीति–योजना प्रस्तुत गर्नेछ। साथै, वन संरक्षण, दिगो उपयोग, जैविक विविधताको संरक्षण र समुदायको आयआर्जन प्रवर्द्धनसँग सम्बन्धित महत्वपूर्ण प्रस्तावहरूमा समेत छलफल हुने समूहले जनाएको छ।
समूहका अध्यक्ष पुनाराम चौधरीका अनुसार साधारण सभा केवल वार्षिक बैठक मात्र नभई वन र समुदाय दुवैको हितलाई जोड्ने सामुदायिक अभियानका रूपमा महत्वपूर्ण छ। उनले सबै उपभोक्ताहरूको उपस्थिति र सक्रिय सहभागिता अनिवार्य रहेको भन्दै, “वन हाम्रो साझा सम्पत्ति हो, यसलाई दिगो बनाउन एकताबद्ध भएर अघि बढ्न आवश्यक छ,” भन्ने आग्रह गरेका छन्।
सभामा स्थानीय उपभोक्तासहित समुदायका अगुवा, सरोकारवाला निकायका प्रतिनिधि तथा विभिन्न सामाजिक संस्थाका पदाधिकारीहरूको पनि उपस्थिति रहने अपेक्षा गरिएको छ।
