भदौ ४ धनगढी
भेटेरिनरी अस्पताल तथा पशुसेवा विज्ञ केन्द्र कैलालीले छ लाख नौ हजार नौ सय नौ पशु चौपायालाई विभिन्न रोगविरुद्धको खोप लगाएको छ ।
विज्ञ केन्द्रले गत आर्थिक वर्ष २०८१/८२ मा जिल्लाका १३ वटै स्थानीय तहका भैँसी, राँगा,गाईगोरु,बाख्रालगायत पशु चौपायालाई विभिन्न रोगविरुद्धको खोप लगाएको हो ।
दुई लाख ९३ हजार छ सय ५० गाईगोरु र भैँसीराँगालाई खोरेतविरुद्धको खोप तथा दुई लाख ६७ हजार भेडाबाख्रालाई पिपिआर खोप लगाइएको भेटेरिनरी अस्पताल तथा पशुसेवा विज्ञ केन्द्र कैलालीका सूचना अधिकारी विजयराम दमाईले जानकारी दिए ।
उनका अनुसार ४८ हजार गाईगोरुलाई लम्पी स्किनविरुद्धको खोप,दुई सय ५० वङ्गुरलाई क्लासिकल स्वाइन फिवर र एक हजार नौ सामुदायिक तथा घरपालुवा कुकुरलाई रेविजविरद्धको खोप लगाइएको छ ।
सूचना अधिकारी दमाईले भने,–‘खोप अभाव थिएन् । हामीले किसानको माग अनुसार खोप लगाउने गरेका छौँ । प्रत्येक पालिकामा पशु प्राविधिकमार्फत खोप लगाउने गरिएको छ । किसानलाई सबै खोप निःशुल्क उपलब्ध गराइएको हो ।’
उनले चालु आर्थिक वर्ष २०८२/८३ को हालसम्म जिल्लाका विभिन्न पालिकाका ३७ हजार गाईगोरुलाई लम्पी स्किनविरुद्धको खोप लगाइसकेको जानकारी दिए ।
