धनगढी, भदौ ४ – स्वास्थ्य तथा जनसंख्यामन्त्री प्रदीप पौडेलले कैलालीको गेटास्थित सहिद दशरथ चन्द स्वास्थ्य विज्ञान विश्वविद्यालयमा आगामी असारदेखि एमबिबिएस तहको पढाइ सुरु हुने बताएका छन्। उनले छिट्टै ३०० शय्याको अस्पताल सञ्चालन गरेर शिक्षण गतिविधि प्रारम्भ गरिने स्पष्ट पारे।
बुधबार सुदूरपश्चिम प्रदेशका विभिन्न जिल्लाको भ्रमणका क्रममा कैलाली आएका मन्त्री पौडेलले नेपाली काँग्रेस कैलालीद्वारा धनगढीमा आयोजना गरिएको कार्यकर्ता भेटघाट कार्यक्रममा बोल्दै गेटा मेडिकल कलेजलाई सञ्चालनका लागि स्वास्थ्य मन्त्रालयले आफ्नो तर्फबाट आवश्यक सबै तयारी पूरा गरेको दाबी गरे। उनले ३०० शय्याको अस्पताल सञ्चालन भएपछि शिक्षा मन्त्रालयलाई हस्तान्तरण गर्ने व्यवस्था मिलाइएको बताए।
तर, मन्त्री पौडेलले गुनासो गर्दै भने, “गेटामा बनेका भवनहरू शिक्षा मन्त्रालयले प्रयोग गर्न नदिएकै कारण ढिलाइ भएको हो। सरकारको संरचना एउटै भए पनि मन्त्रालयबीचको असमझदारीले समस्या निम्त्याएको छ।”
उनले गेटा स्थलगत निरीक्षण गर्ने योजना बनाए पनि आन्दोलनकारीले नाराबाजी गरेपछि नजाने निर्णय गरेको जानकारी दिए। “रातो किताबमा बजेट नै बिनियोजन भएको अवस्थामा आन्दोलनको अर्थ छैन,” मन्त्री पौडेलले भने, “बिरोधका कारण आफू विचलित नहुने र गेटालाई चाँडै सञ्चालन गर्ने प्रतिबद्धता लिएको छु।”
गेटा मेडिकल कलेजको स्थापनाका लागि ६ अर्बभन्दा बढी खर्चमा पूर्वाधार तयार पारिएको छ। विश्वविद्यालय सम्बन्धी ऐन पनि बनेर कानुनी बाटो खुलेको छ तर अस्पताल सञ्चालन भने अझै विवाद र मन्त्रालयबीचको मतभेदका कारण अघि बढ्न सकेको छैन।
यसैबीच, मन्त्री पौडेलले बुधबार गेटा अस्पतालमा निर्माण भएको पाँच शय्याको आकस्मिक कक्ष उद्घाटन गर्ने तयारी गरे पनि संघर्ष समितिको विरोधपछि कार्यक्रम स्थगित भयो। बिहानैदेखि आन्दोलनमा उत्रिएका समितिका सदस्यहरूले मन्त्रीको विरोध गरेका कारण उनी गेटा नपुगी सिधै धनगढी फर्किएका थिए।
संघर्ष समितिका संयोजक लोकराज पाण्डेले पाँच शय्याको आकस्मिक कक्ष उद्घाटन गरेर जनतालाई “भ्रमित गर्ने नाटक” स्वीकार्य नभएको चेतावनी दिएका छन्। उनले भने, “गेटा विश्वविद्यालयको ऐन भइसकेको छ। अब उपकुलपति, रजिष्ट्रारलगायत पदाधिकारी नियुक्त गरी कम्तीमा ३०० शय्याको अस्पताल सञ्चालन गर्नुपर्छ। पाँच शय्याको आकस्मिक कक्ष उद्घाटन गरेर प्रचार गर्ने काम जनताले स्वीकार गर्ने छैन।
