हेमा भट्ट
कञ्चनपुर, भाद्र ४ –
कृष्णपुर नगरपालिका–९ नं. वडाले सार्वजनिक बाटोको व्यवस्थापनलाई सहज र सुरक्षित बनाउन विशेष सूचना जारी गरेको छ। वडाले सार्वजनिक बाटोमा गाई, गोरु, भैंसी, बाखा जस्ता घरपालुवा जनावर बाँध्ने वा छोड्ने, फोहोर फाल्ने, ढुङ्गा–इटा वा काठदाउरा राख्ने कार्य तत्काल रोक्न आग्रह गरेको छ।
वडा अध्यक्ष कैलाश बहादुर बलायरले सूचनामार्फत भनेका छन्, “सार्वजनिक बाटोमा जनावर बाँध्दा आवतजावतमा असहज मात्र होइन, दुर्घटनाको जोखिम पनि बढेको छ। त्यसैले अब यस्तो कार्यलाई सहन गरिँदैन।
वडाले विगतमा जनावर र फोहोरका कारण सडकमा अनेक समस्या देखिएको उल्लेख गरेको छ। पैदलयात्रीलाई आवतजावतमा कठिनाइ हुने, मोटरसाइकल र सवारीसाधन दुर्घटनामा पर्ने सम्भावना बढ्ने र फोहोरले सरसफाइ र स्वास्थ्यमा गम्भीर असर पार्ने बताइएको छ।
सूचनामा भनिएको छ कि वडावासीले सार्वजनिक बाटोमा जनावर बाँध्ने वा छोड्ने, फोहोर थुपार्ने कार्य गरेमा उनीहरूलाई कानुनअनुसार जरिवाना गरिनेछ। साथै वडा कार्यालयबाट पाइने सेवासुविधाबाट समेत वञ्चित गराइने चेतावनी दिइएको छ।
कृष्णपुर नगरपालिकाले “राष्ट्रिय स्वाभिमान, कल्याणकारी राज्य, सामाजिक सुरक्षा र समृद्धि”लाई आधार मानेर गाउँ–सहरको समग्र विकासलाई अघि बढाइरहेको छ। सडक, खानेपानी, शिक्षा, संचार, स्वास्थ्य, सुरक्षा, कृषि, वन तथा पर्यटनलाई प्राथमिकतामा राख्दै नगरलाई आधुनिक बनाउन वडावासीको सक्रिय सहभागिता अपरिहार्य रहेको वडा अध्यक्ष बलायरले बताए।
उनले थपे, “सफा र सुरक्षित सडक बनाउन सबै वडावासीको साथ आवश्यक छ। नियम तोड्नेले सजाय भोग्नेछन्, तर नियम पालना गर्नेले सफा, सुन्दर र सुरक्षित वडामा बास गर्ने सौभाग्य पाउनेछन्।”
