गणेश क्षेत्री भदौ १३
कैलाली, टीकापुर — टीकापुर नगरपालिका–६, सत्तिमा अवस्थित श्री उज्यालो बहुउद्देश्यीय सहकारी संस्था लिमिटेडको १९औं वार्षिकोत्सव भव्यतापूर्वक सम्पन्न भएको छ।
सहकारीका अध्यक्ष डम्बरबहादुर घर्तीको सभापतित्वमा भएको कार्यक्रममा टीकापुर–६ का वडाध्यक्ष बलिराम चौधरी प्रमुख अतिथि तथा वडानं ७ का अध्यक्ष यज्ञ प्रसाद न्यौपाने विशिष्ट अतिथि रहनुभएको थियो।
प्रमुख अतिथि चौधरीले सहकारीले बिजवृद्धि कार्यक्रममार्फत कृषकहरूको जीवनस्तर उकास्न महत्वपूर्ण भूमिका खेलेको उल्लेख गर्नुभयो। उहाँले विगतमा भारतबाट गुणस्तरहीन बिउ ल्याउँदा किसानहरू लागत धेरै बढेपनि उत्पादनमा कमी भएर समस्यामा परेको स्मरण गर्दै हाल स्थानीयस्तरमै गुणस्तरीय बिउ उत्पादन हुन थालेपछि उत्पादनमा वृद्धि भएको बताउनुभयो। साथै, उहाँले “थोपाथोपा मिलेर समुद्र बन्ने जस्तै, थोरै–थोरै गरेर बचत गर्दा ठूलो आवश्यकता टार्न सकिन्छ,” भन्दै बचतलाई शिक्षा, स्वास्थ्य र व्यवसायमा लगानी गर्नुपर्नेमा जोड दिनुभयो।
त्यसैगरी, विशिष्ट अतिथि न्यौपानेले सहकारी किसानहरूको आर्थिक उत्थानसँगै सामाजिक गतिविधिमा पनि सक्रिय रहेको बताउनुभयो।
कार्यक्रम व्यवस्थापक रामकृष्ण चौधरीको स्वागत मन्तव्यबाट सुरु भएको थियो। कार्यक्रममा प्रगतिशील बचत तथा ऋण सहकारीका अध्यक्ष गीता चौधरी, पत्रकार गणेश क्षेत्री, सल्लाहकार संयोजक विरेन्द्र शाह लगायतले शुभकामना व्यक्त गर्नुभएको थियो।
सहकारीका कोषाध्यक्ष पराङ्कुस चौधरीले आर्थिक विवरण प्रस्तुत गर्दै २०८१/८२ असार मसान्तसम्म सहकारीमा १ हजार ८७ जना सदस्य आवद्ध भइसकेको र ५३ लाख ३४ हजार ४ सय रुपैयाँ सेयर पुँजी रहेको जानकारी दिनुभयो। सहकारीले २ करोड २१ लाख ३ सय ५३ रुपैयाँ कर्जा लगानी गरी १० लाख ३२ हजार ८ सय ८६ रुपैयाँ नाफा आर्जन गर्न सफल भएको छ।
स्थापना कालमा ३१ सदस्यबाट सुरु भएको सहकारीले हाल धान, गहुँ लगायतका बिउ उत्पादनलाई प्राथमिकता दिँदै आएको छ। हालसम्म १ सय बिगाहा क्षेत्रफलमा बिउ उत्पादन गरी कैलाली, कञ्चनपुर, दाङ र चितवनसम्म बिक्री वितरण गर्दै आएको सहकारीले यस वर्षदेखि माटोको उर्वराशक्ति बढाउन अर्गानिक खेतीलाई प्रोत्साहन गर्न ढैचा खेतीको बिउ उत्पादन समेत सुरु गरेको छ।
कार्यक्रमको सञ्चालन सहकारीका उपाध्यक्ष शसि श्रेष्ठले गर्नुभएको थियो।
