प्रदिप राना, भदौँ १३,
कञ्चनपुर- सुदूरपश्चिमको मौलिक लोकसंस्कृति संरक्षण गर्ने उद्देश्यले कञ्चनपुरको गणेश सामुदायिक वन उपभोक्ता समूहले गौरा महोत्सव एवम् देउडा खेल कार्यक्रम गर्ने भएको छ।
बेदकोट नगरपालिका–६ मुसेपानीस्थित समूहले आउँदो सोमबारदेखि बुधबारसम्म कार्यक्रम आयोजना गर्ने जनाएको छ। समूहका अध्यक्ष किसनसिंह भण्डारीले हराउँदै गएको देउडा खेलको संरक्षणसँगै वन वातावरणको महत्वबारे जनचेतना फैलाउने उद्देश्यले कार्यक्रम आयोजना गरिएको जानकारी दिए।
उनका अनुसार सुदूरका चर्चित तथा स्थानीय देउडियाहरूबाट हरेक दिन देउडा खेल प्रस्तुत गरिने छ भने प्रत्येक दिन फरक–फरक प्रमुख तथा विशिष्ट अतिथिहरूको उपस्थितिमा कार्यक्रम सञ्चालन हुनेछ।
यसैगरी, समूहका कोषाध्यक्ष रामसिंह धामीले सामुदायिक वनले स्थानीय मौलिक संस्कृतिको संरक्षणमा अग्रसर रहनुपर्ने भन्दै यस किसिमका कार्यक्रमहरूले संस्कृतिको जगेर्नासँगै सामाजिक एकतामा पनि योगदान गर्ने विश्वास व्यक्त गरे।
आयोजक समितिले देउडा प्रेमी तथा स्थानीय समुदायलाई उक्त कार्यक्रममा सक्रिय सहभागिता जनाउन आह्वान गरेको छ।
