हेमा भट्ट भाद्र २०८२
राजघाटले सांस्कृतिक पहिचान संरक्षण र गाउँ–समुदायबीच मेलमिलापको नयाँ पहल थालेको छ। भाद्र ७ गते यहाँका जेष्ठ नागरिक, समाजसेवी तथा बुद्धिजीवी अमर बहादुर साउदको नेतृत्वमा विशेष बैठक बसेको थियो, जसमा दुई दिने डेउडा कार्यक्रम सञ्चालनका लागि नयाँ समिति गठन गरिएको छ।
बैठकले दिनेश ओझाको संयोजकत्वमा ११ सदस्यीय डेउडा कार्यक्रम सञ्चालन समिति गठन गर्ने निर्णय गरेको छ। समितिले भाद्र १६ र १७ गते आयोजना हुने कार्यक्रमलाई व्यवस्थित र भव्य बनाउन विस्तृत योजना बनाउनेछ। कार्यक्रमको स्थल डिल्ली राज अवस्थीको घर (गमरा घर) तय गरिएको छ।
समितिका अध्यक्ष अमर बहादुर साउदले भने, “हाम्रो सांस्कृतिक धरोहर जगेर्ना गर्नु केवल मनोरञ्जनको माध्यम मात्र होइन, भविष्यका पुस्तालाई हाम्रो पहिचान हस्तान्तरण गर्ने महान जिम्मेवारी हो। डेउडा कार्यक्रम यस सन्दर्भमा विशेष महत्व राख्छ।”
समितिका संयोजक दिनेश ओझाले सम्पूर्ण गाउँबासीलाई कार्यक्रममा सहभागी भई गाउँको सांस्कृतिक पहिचान जगेर्नको अभियानमा हातेमालो गर्न आह्वान गरेका छन्। उनले थपे, “यस पटकको डेउडा कार्यक्रम भव्य, रोचक र समृद्ध सांगीतिक प्रस्तुति लिएर आउँदैछ। युवा–पुराना सबैको सहभागिताले यसलाई साँच्चै विशेष बनाउनेछ।”
राजघाटका विभिन्न उमेर समूहका कलाकारहरूले परम्परागत गीत र नृत्य प्रस्तुत गर्दै समुदायमा सांगीतिक प्रतिभा उजागर गर्नेछन्। समितिले सुरक्षा, स्थान सजावट, सांगीतिक सामग्री र प्रस्तुति व्यवस्थापनसम्बन्धी विषयमा विशेष तयारी गरिसकेको छ।
स्थानिय बासिन्दाहरूले भने, “डेउडा हाम्रो पहिचान हो, हाम्रो संस्कार हो। यस कार्यक्रमले गाउँमा मात्र नभई हाम्रो सांस्कृतिक गौरवमा पनि नयाँ जीवन दिनेछ।”
विशेषत, गाउँको सांस्कृतिक जीवनमा उत्साह भर्ने यो कार्यक्रमले समुदायलाई एकजुट गर्ने, युवापुस्तामा सांगीतिक रुचि जगाउने र सामाजिक सद्भाव प्रवर्द्धन गर्ने विश्वास गरिएको छ। राजघाटका नागरिकहरू आगामी डेउडा कार्यक्रमको प्रतीक्षा गरिरहेका छन् र यस पर्वले गाउँको सांस्कृतिक पहिचानलाई अझ मजबुत बनाउने अपेक्षा गरिएको छ।
