हेमा भट्ट, कञ्चनपुर — भाद्र १४, २०८२
कञ्चनपुर, कृष्णपुर नगरपालिका–९, घोडाघाटस्थित श्री सिता सामुदायिक वन उपभोक्ता समूहले शनिबार आठौं वार्षिक साधारणसभा तथा सार्वजनिक सुनुवाइ कार्यक्रम उत्साहपूर्ण वातावरणमा सम्पन्न गरेको छ। सामुदायिक वन परिसरमै आयोजित कार्यक्रममा स्थानीय निकाय, राजनीतिक दल, समाजसेवी, बुद्धिजीवी, सामुदायिक वनका पदाधिकारी तथा सरोकारवालाको उल्लेख्य सहभागिता थियो।
सभाको अध्यक्षता समूहका अध्यक्ष पुनाराम चौधरीले गरेका थिए भने कार्यक्रमका प्रमुख अतिथि सुदूरपश्चिम प्रदेश सभा सदस्य माननीय गीता चौधरी रहनुभएको थियो। कार्यक्रममा वन निर्देशनालय प्रमुख हेमराज विष्ट, वडा नं. ९ का अध्यक्ष कैलाश बलायर, डिभिजन वन कार्यालयका वरिष्ठ अधिकृत विश्वश्वर प्रसाद जोशी, सहायक अधिकृत मणिदत्त भट्ट, पूर्व माननीय महेशदत्त जोशी, विभिन्न सामुदायिक वनका अध्यक्ष तथा समाजसेवीहरू सहभागी थिए।
युवा शिक्षक तथा समाजसेवी **मदन रोकाया (रिदम)**ले सञ्चालन गरेको कार्यक्रममा स्वागत मन्तव्य उपाध्यक्ष जितबहादुर बोहराले राखेका थिए। प्रमुख अतिथिद्वारा पानसमा दियो बालेर, बृक्षमा जल चढाएर र व्यानर वाचन गर्दै औपचारिक उद्घाटन गरिएको थियो। राष्ट्रिय गान, मौनधारण र सांगीतिक प्रस्तुति सहित कार्यक्रम अघि बढाइएको थियो।
अध्यक्ष चौधरीले प्रस्तुत गरेको प्रतिवेदन अनुसार समूहको आय–व्यय २०८१/०८२ मा ३२ लाख ४० हजार ७३७ रुपैयाँ रहेको थियो। आगामी वर्ष २०८२/०८३ का लागि अनुमानित बजेट ५५ लाख २५ हजार रुपैयाँ प्रस्ताव गरिएको छ। हाल समूहको सामुदायिक वन क्षेत्रफल २१९.९८ हेक्टर, कुल घरधुरी ५३७ र जनसंख्या २,११९ (महिला १,०४७ र पुरुष १,०७२) रहेको तथ्याङ्क प्रस्तुत गरिएको थियो।
प्रमुख अतिथि माननीय गीता चौधरीले सामुदायिक वन संरक्षण र पारदर्शिता अहिलेको मुख्य आवश्यकता भएको बताउँदै आगामी वर्षको प्रदेश सरकारको बजेटमा १५ लाख रुपैयाँ भवन निर्माणका लागि विनियोजन भएको जानकारी दिइन्।
विशिष्ट अतिथि मोहन विष्टले नियम–कानुनअनुसार अझ बढी जिम्मेवारीसाथ काम गर्नुपर्नेमा जोड दिए। पूर्व माननीय महेशदत्त जोशीले दिगो बन कार्यान्वयनमा ढिलाइ हुनु सरकारको कमजोरी भएको उल्लेख गरे।
सल्लाहकार संयोजक छत्रबहादुर महराले क्युफिट दर अत्यधिक बढेको कारण गरिब वर्ग प्रभावित भएको बताउँदै राज्यप्रति असन्तुष्टि जनाए।
महाकाली सामुदायिक वन अध्यक्ष वीरबहादुर राजवंशीले “वन संरक्षण मात्र होइन, उपभोक्ताको जीवनस्तर सुधार गर्ने कार्यमा पनि सामुदायिक वनले भूमिका खेल्नुपर्छ” भन्दै सीता सामुदायिक वनलाई नमुना बनाउनुपर्नेमा जोड दिए।
सिंहपुर सामुदायिक वन अध्यक्ष जोगराज चौधरीले सरकारसँगको सम्झौता पालना नभए आन्दोलन गर्ने चेतावनी दिए भने CFCC कैलालीका आन सिंह ढुङ्गानाले सीता सामुदायिक वनलाई नमुना वनतर्फ अघि बढिरहेको उल्लेख गर्दै निरन्तर समर्थन रहने बताए।
कार्यक्रममा सहभागी ५१ जना जेष्ठ नागरिकलाई दोसल्ला ओढाएर सम्मान गरिएको थियो। जेष्ठ नागरिक लक्ष्मी देवी सिंहले पहिलो पटक सामुदायिक वनबाट यस्तो सम्मान पाएको अनुभव साझा गर्दै खुसी व्यक्त गरिन्। यससँगै स्थानीय युवादेखि महिलासम्मले प्रस्तुत गरेका लोकनृत्य, गीत र सांस्कृतिक प्रस्तुतिले कार्यक्रमलाई अझै मनोरञ्जनात्मक बनाएको थियो।
वडा अध्यक्ष कैलाश बलायरले सामुदायिक वनसँग सहकार्य गर्दै सडक, पुल, शिक्षा लगायतका क्षेत्रमा स्थानीय सरकार निरन्तर खाँदाखाँदै अघि बढ्ने प्रतिबद्धता जनाए।
सभाको समापन गर्दै अध्यक्ष पुनाराम चौधरीले सबै अतिथि, पदाधिकारी र स्थानीयलाई धन्यवाद दिँदै “सिता सामुदायिक वनलाई अझ सबल, सक्षम र दिगो बनाउन निरन्तर लागिरहने” प्रतिबद्धता जनाए। यसरी, पारदर्शी आर्थिक प्रतिवेदन, जेष्ठ नागरिक सम्मान, सरोकारवालाको सुझाव र प्रेरणादायी भनाइ सहित सम्पन्न आठौं वार्षिक साधारणसभा सहभागी सबैका लागि अविस्मरणीय बनेको छ।
