कृष्णपुर, कञ्चनपुर — भाद्र १५, २०८२
हेमा भट्ट
स्थानीय समुदाय र स्वास्थ्य संस्थाको सहकार्यमा आयोजित निःशुल्क आँखा परिक्षण शिविर कृष्णपुर नगरपालिका–८ स्थित श्री नवज्योति आधारभूत विद्यालयमा सम्पन्न भएको छ। शिविरको मुख्य उद्देश्य ग्रामीण क्षेत्रका नागरिकलाई आँखासम्बन्धी स्वास्थ्य सेवामा पहुँच दिलाउनु थियो।
शिविरमा नेपाल नेत्र ज्योति संघ गेटा आँखा अस्पताल, कैलाली र स्थानीय आयोजनाकर्ता श्री बनदेवी सामुदायिक वन उपभोक्ता समूह, कृष्णपुर–९, राजघाटको सहकार्य रहेको थियो। कार्यक्रममा करिब ४५० जनाले आँखा परिक्षण गराएका थिए भने ५६ जनाको मोतियाबिन्दु निःशुल्क अप्रेसनका लागि गेटा आँखा अस्पतालमा पठाइने व्यवस्था गरिएको थियो।
सहभागीहरूले प्रदान गरिएको सेवाप्रति खुशी व्यक्त गर्दै यस्ता पहलहरूले समुदायमा स्वास्थ्य सचेतना बढाउने विश्वास व्यक्त गरे। आयोजकहरूले गेटा आँखा अस्पताल र स्थान उपलब्ध गराएको श्री नवज्योति आधारभूत विद्यालयलाई विशेष धन्यवाद व्यक्त गरेका छन्।
आयोजक संस्थाका अनुसार, यस प्रकारका निःशुल्क स्वास्थ्य शिविरहरू ग्रामीण क्षेत्रका नागरिकको जीवनस्तर सुधारमा महत्वपूर्ण योगदान पुर्याउनेछन्।
