धनगढी – भाद्र १५, २०८२
सुदूरपश्चिम प्रदेशका मुख्यमन्त्री कमल बहादुर शाहले प्रदेशमा पर्याप्त ऊर्जा सम्भावना रहेको उल्लेख गर्दै लगानीकर्ताहरुलाई जलविद्युत क्षेत्रमा लगानी गर्न आह्वान गर्नुभएको छ ।
मंसिर १ र २ गते कैलालीको धनगढीमा आयोजना हुन लागिरहेको विकास तथा लगानी सम्मेलनको पूर्व तयारी अन्तर्गत ऊर्जा, जलस्रोत तथा सिँचाइ मन्त्रालयमा आइतबार आयोजित अन्तरक्रिया कार्यक्रममा मुख्यमन्त्री शाहले नयाँ तथा पुराना दुवै लगानीकर्तालाई तत्काल लगानी सुरु गर्न आग्रह गर्नुभयो ।
“सुदूरपश्चिममा पर्याप्त उर्जाको सम्भावना छ । नयाँ लगानीकर्ताहरुलाई त्यहाँ लगानी गर्न आह्वान गर्दछु । लाइसेन्स लिइसकेकाहरूले पनि ढिलो नगरी काम सुरु गर्नुपर्छ,” उहाँले भन्नुभयो ।
उहाँले सुदूरपश्चिममा हुन लागेको लगानी सम्मेलन मुलुककै विकासमा कोसेढुंगा बन्ने विश्वास व्यक्त गर्दै प्रदेश सरकारले लगानीमैत्री वातावरण निर्माण गरिरहेको बताए । “विभिन्न कानुन संशोधन गर्दै लगानी सहज बनाउने तयारीमा छौँ । लगानीकर्ताले ढुक्क भएर लगानी गर्न सक्ने वातावरण हामी तयार पार्दैछौँ,” उहाँले थप्नुभयो ।
अन्तरक्रिया कार्यक्रममा ऊर्जा, जलस्रोत तथा सिँचाइ मन्त्री दीपक खड्काले पनि सरकारले निजी क्षेत्रसँग हातेमालो गर्दै लगानी भित्र्याउने स्पष्ट पार्नुभयो । उहाँले जग्गा र वनसँग सम्बन्धित समस्या समाधान गर्ने प्रक्रिया अघि बढाइएको जानकारी दिनुभयो ।
“जग्गा विवादका कारण परियोजना रोक्ने प्रवृत्ति अन्त्य गर्न कानुनी व्यवस्था गर्दैछौँ । स्टे अर्डर दिई काम रोक्ने चलन गलत हो, यसलाई नीतिगत रूपमा सुधार गर्दैछौँ,” मन्त्री खड्काले भन्नुभयो ।
उनका अनुसार सुदूरपश्चिममा पर्याप्त स्रोत हुँदाहुँदै पनि प्रयोगमा ल्याउन नसकिएको छ । तर नीतिगत सुधारपछि प्रदेशको उर्जाले देशकै समृद्धिमा योगदान पुर्याउने विश्वास व्यक्त गर्नुभयो ।
मन्त्री खड्काले ट्रान्समिसन लाइनको अभावले लगानीकर्तालाई कठिनाइ भइरहेको स्वीकार गर्दै दुई वर्षभित्र उक्त समस्या समाधान गर्ने दाबी गर्नुभयो । निजी क्षेत्रलाई ३० मेगावाटसम्म उत्पादित विद्युत बिक्री गर्ने व्यवस्था मिलाइने जानकारी दिँदै उहाँले “यसपछि लगानी सुरक्षित हुनेछ र विद्युत जसलाई पनि बेच्न सकिनेछ” भन्नुभयो ।
कार्यक्रममा प्रमुख सचिव डा. कमल पोखरेलले आगामी लगानी सम्मेलनबारे जानकारी गराउनुभयो । लगानी तथा विकास सम्मेलनका परियोजना विज्ञ दिलीप भट्टले सुदूरपश्चिममा लगानीको अवस्था, चुनौती र सम्भावनाबारे कार्यपत्र प्रस्तुत गर्नुभयो ।
छलफलमा ऊर्जा क्षेत्रमा लगानी गरिरहेका तथा लाइसेन्स प्राप्त दुई दर्जनभन्दा बढी लगानीकर्ताको उपस्थिति थियो । उनीहरूले सरकारसँग प्रसारण पूर्वाधार निर्माण, ट्रान्समिसन लाइनको क्षमता बढाउने, जग्गा तथा वनसम्बन्धी समस्या समाधान गर्ने र छिटो निर्णय गर्न सकिने वातावरण बनाउन सुझाव दिएका थिए ।
लगानीकर्ताले कर्णाली र सुदूरपश्चिममा मुलुककै आधा जलविद्युत सम्भावना रहेको उल्लेख गर्दै अब भारत मात्र नभई चीनमा समेत विद्युत निर्यात गर्नुपर्नेमा जोड दिए । दोधरा–चाँदनी बन्दरगाह निर्माणले पनि प्रदेशको समृद्धिमा टेवा पुग्ने विश्वास उनीहरूको थियो ।
कार्यक्रमको सहजीकरण प्रदेश नीति तथा योजना आयोगका सदस्य नृप सुनारले गर्नुभएको थियो । उहाँले पनि सबै लगानीकर्तालाई सुदूरपश्चिममा आउन आग्रह गर्नुभयो ।
