हेमा भट्ट, भाद्र १५
कञ्चनपुर —सुदूरपश्चिमेली मौलिक चाड गौरा पर्व २०८२ को अवसरमा कञ्चनपुरको कृष्णपुर नगरपालिका–९, राजघाटमा आयोजित शुभकामना आदान–प्रदान तथा बृहत् देउडा कार्यक्रम भव्य रूपमा सुरु भएको छ। भदौ १५ गतेदेखि १८ गतेसम्म चल्ने चार दिने यस कार्यक्रममा सांस्कृतिक प्रस्तुति, देउडा गायन, सामूहिक उत्सवसँगै पत्रकार र सुरक्षाकर्मी सम्मानसमेत गरिएको छ।
कार्यक्रम कृष्णपुर नगरपालिका वडा नं. ९ कार्यालयको सहयोग, श्री शिव दुर्गा मन्दिर व्यवस्थापन समिति र शिखर काफली सेवा समाज, नेपाल (धनगढी–१३, राजपुर, कैलाली) को आयोजनामा सुरु गरिएको हो। व्यवस्थापन जिम्मेवारी राजघाट उपसमितिले निर्वाह गरेको थियो।
सभापतित्व छत्र बहादुर महराले गर्नु भएको थियो भने प्रदेशसभा सदस्य डम्मरी महरा (रक्षा) प्रमुख अतिथि रहनुभयो। विशेष अतिथिका रूपमा टेक बहादुर रैका, कैलाश बलायर (वडा नं. ९ अध्यक्ष), यज्ञ बहादुर महरा (गोदावरी–२), पुष्पराज जोशी, नरेन्द्र राज शर्मा, डिएसपी टेक बहादुर जोरा, बसुदेव जोशी, हेमराज जोशी लगायत समाजसेवी र बुद्धिजीवी सहभागी थिए।
कार्यक्रमको मुख्य आकर्षण पत्रकार र सुरक्षाकर्मी सम्मान कार्यक्रम थियो। शिखर काफली सेवा समाज, नेपालले सञ्चार, पत्रकारिता र सुरक्षाक्षेत्रमा योगदान पुर्याएका पाँच व्यक्तित्वलाई सम्मानपत्र प्रदान गर्यो। सम्मानित हुनेमा टेक राज जोशी (कान्तिपुर टेलिभिजन), गोबिन्द राज रोस्यारा (गोदावरी अनलाइन), शेर बहादुर ऐर (सनराइज टेलिभिजन), पदम बहादुर सुनार (रैकवार खबर राष्ट्रिय दैनिक) र डिएसपी टेक बहादुर जोरा थिए।
कार्यक्रममा वक्ताहरूले गौरा पर्व केवल धार्मिक चाड नभई सामुदायिक एकता, सहकार्य र सांस्कृतिक संरक्षणको प्रतीक भएको उल्लेख गरे। देउडा गीत, नृत्य र सामूहिक सहभागिताले सुदूरपश्चिमेली जीवनशैली उजागर गरेको प्रशंसा गरिएको थियो।
समापन सत्रमा सचिव राजेन्द्र रैकाले धन्यवाद ज्ञापन गर्दै आगामी दिनमा गौरा पर्वलाई अझ व्यवस्थित रूपमा राष्ट्रिय स्तरमा प्रवर्द्धन गर्ने प्रतिबद्धता जनाउनुभयो। पत्रकार र सुरक्षाकर्मी सम्मानलाई निरन्तरता दिने निर्णयसमेत सार्वजनिक गरिएको थियो।
यस वर्षको गौरा पर्वमा हजारौंको उपस्थिति रहने अनुमान गरिएको छ। विभिन्न कलाकारहरूको प्रस्तुति सहित भव्य रूपमा पर्व मनाइने तयारी भएको आयोजकहरूले जानकारी दिए।
