कार्तिक १६
धनगढी —सुदूरपश्चिमका अपाङ्गता भएका व्यक्तिहरूले जेनजी आन्दोलनका क्रममा भएका क्षतिको बहानामा आफ्नाे वर्गका लागि छुट्याइएका बजेटमा कटौती नगर्न तीन तहका सरकारलाई कडा खबरदारी गरेका छन्।
राष्ट्रिय अपाङ्ग महासंघ सुदूरपश्चिम प्रदेश समितिद्वारा आज धनगढीमा आयोजित सरोकारवालासँगको छलफल कार्यक्रममा सहभागी अपाङ्गता अभियानकर्मीहरूले आफूहरू सधैं राज्य र समाजको प्राथमिकताबाट पर धकेलिएको वर्ग भएको उल्लेख गर्दै, “कार्यालय र गाडी पुनः बनाउन सकिन्छ, तर हामीले बाँच्नका लागि पाएको थोरै सहयोग नै काटियो भने मृत्युबरण गर्नुपर्ने अवस्था आउँछ,” भन्ने चेतावनी दिए।
सहभागीहरूले आन्दोलनमा क्षति भएका भौतिक संरचनाको विकल्प खोजेर काम चलाउन सकिने बताए। तर अपाङ्गता क्षेत्रका अत्यावश्यक बजेट कटौती भएमा घरबाहिर निस्कन थालेका अपाङ्गता भएका व्यक्ति पुनः घरभित्रै थुनिन बाध्य हुने बताएका छन्।
राष्ट्रिय अपाङ्ग महासंघ सुदूरपश्चिम प्रदेश अध्यक्ष कृष्णप्रसाद धमलाले छलफलबाट तीन तहका सरकारहरूलाई खबरदारी गर्ने निर्णय गरिएको जनाउँदै समितिको बोर्ड बैठक बसेर चाँडै दबाबमूलक कार्यक्रम तय गरिने जानकारी दिए।
कार्यक्रममा धनगढी उपमहानगरपालिका–२ का वडा अध्यक्ष धर्मराज ओझा, अपाङ्गता अभियन्ता रमेश बस्नेत, भवानी ऐर, नरेन्द्र जैशी, निर्मला बिष्ट, इन्द्र पाली, चेतराज भट्टलगायतले आ–आफ्ना धारणा राख्दै अपाङ्गता भएका व्यक्तिहरूको हक, अधिकार र जीवनको सम्मानमा सरकारलाई संवेदनशील हुन आग्रह गरे।
