हेमा भट्ट, कार्तिक १८
कञ्चनपुर – छिमेकी राष्ट्र भारतको उत्तराखण्ड राज्यस्थित रेवाला क्षेत्रमा आयोजित विशेष प्रशिक्षण कार्यक्रममा सहभागी हुन कञ्चनपुर जिल्ला, कृष्णपुर नगरपालिका–८ मज्गैका तेक्वान्दो प्रशिक्षक प्रशान्त चौधरी भारत प्रस्थान गर्नुभएको छ।
भारतीय सेनाको औपचारिक निमन्त्रणामा १० दिनसम्मको प्रशिक्षण दिने उद्देश्यले भारत पुगेका चौधरी सुदूरपश्चिम प्रदेशका पहिलो नेपाली खेलाडी हुन्, जसले प्रत्यक्ष रूपमा भारतीय सेनालाई तेक्वान्दो प्रशिक्षण दिने अवसर पाएका छन्।
गरिब परिवारमा जन्मिए पनि चौधरीले कठिनाइलाई पछि पार्दै तेक्वान्दोको माध्यमबाट आफ्नो पहिचान निर्माण गर्न सफल भएका छन्। आफ्नै खर्च र लगानीमा अघि बढेका उनले भने,
अरू देशले मेहनती खेलाडीलाई सम्मान गर्छ, तर आफ्नै देश, आफ्नै गाउँले कहिलेकाहीँ चिन्दैनन्। राज्यले यस्ता खेलाडीलाई चिनेर समर्थन गर्न जरुरी छ, भन्दै उनले रैकवार खबरसँग भावुक हुँदै आफ्नो पीडा सुनाए।
रेवाला पुग्दा चौधरीलाई भारतीय सेनाले भव्य स्वागत गरेको थियो। तालिमको पहिलो दिनदेखि नै उनी प्रति सैनिकहरूको उत्साह र सम्मान झल्किएको थियो।
चौधरीले विगत दुई दशकदेखि तेक्वान्दो क्षेत्रमा सक्रिय रहँदै सयौं बालबालिका र युवाहरूलाई प्रशिक्षण दिँदै आएका छन्। उनका प्रशिक्षार्थीहरू मध्ये धेरैले राष्ट्रिय तथा अन्तर्राष्ट्रिय स्तरमा स्वर्णपदक (Gold Certificate) प्राप्त गरिसकेका छन्।
स्थानीय खुला चौर र विद्यालयका साधारण मञ्चहरूबाट सुरुवात गरेका चौधरी आज नेपालको गौरवका रूपमा भारतमा प्रशिक्षण दिन पुग्दा सिंगो सुदूरपश्चिम प्रदेशको गर्व बनेका छन्।
उनले राष्ट्रपति रनिङ सिल्ड, राष्ट्रिय खेलकुद परिषद्को विभिन्न प्रतियोगिता, र सीमा पारका खेलहरूमा उत्कृष्ट प्रदर्शन गर्दै तेक्वान्दोमा नेपाललाई अन्तर्राष्ट्रिय स्तरमा चिनाउने अभियान निरन्तर गरिरहेका छन्।
स्थानीय खेलप्रेमीहरूले भने राज्य र स्थानीय सरकारले यस्ता खेलाडीलाई सम्बद्ध गरी प्रोत्साहन गर्नुपर्ने सुझाव दिएका छन्।
यस्ता प्रतिभा हाम्रो गौरव हुन्, राज्यले यिनीहरूलाई चिन्ने र समर्थन गर्ने समय यही हो, स्थानीय भने ।
प्रशान्त चौधरीको यो यात्रा केवल प्रशिक्षण होइन, गरिबीबाट सुरु भएको एक नेपालीको संघर्ष, स्वाभिमान र देशको नाम विश्वमै चम्काउने सपना पनि हो।
