हेमा भट्ट, कञ्चनपुर — कार्तिक १९
सामुदायिक वन उपभोक्ता राष्ट्रिय महासंघ, नेपाल (एन–फेकोफन)ले सामुदायिक वनका विविध विषयमा अन्तरक्रिया कार्यक्रम सम्पन्न गरेको छ।
कार्यक्रम धनगढीस्थित महासंघको केन्द्रीय कार्यालयमा केन्द्रीय समिति, सुदूरपश्चिम प्रदेश समिति, जिल्ला महासंघ कञ्चनपुर र कैलालीको संयुक्त आयोजनामा सम्पन्न भएको हो। “स–साना सामुदायिक वनलाई जोड्दै, वन सम्वर्द्धनको माध्यमबाट सुशासन र समृद्धि बढाऔँ” भन्ने मूल नाराका साथ आयोजित उक्त कार्यक्रममा सामुदायिक वनको वर्तमान अवस्था, सुशासन, वन व्यवस्थापन र सञ्जाल सुदृढीकरणका विषयमा गहन छलफल गरिएको थियो।
कार्यक्रमको व्यवस्थापन कृष्णपुर नगरपालिका–९, पिपरिया स्थित श्री जानकी सामुदायिक वन उपभोक्ता समूहले गरेको थियो। कार्यक्रममा सामुदायिक वन उपभोक्ता महासंघका केन्द्रीय तथा प्रदेश प्रतिनिधिहरू, जिल्ला महासंघका पदाधिकारी, सामुदायिक वनका अध्यक्षहरू, सरोकारवाला निकायका प्रतिनिधि तथा सरोकारवालाहरूको उल्लेखनीय सहभागिता रहेको थियो।
छलफलका क्रममा सहभागीहरूले सामुदायिक वनहरूबीच सहकार्य, सुशासन प्रवर्द्धन, वन व्यवस्थापनमा पारदर्शिता सुनिश्चित गर्ने उपाय तथा नीति निर्माणमा सामुदायिक वनहरूको प्रभावकारी सहभागिताका विषयमा सुझाव आदान–प्रदान गरेका थिए।
कार्यक्रमको अध्यक्षता कञ्चनपुर जिल्ला महासंघका अध्यक्ष धमानन्द पन्तले गरेका थिए। कार्यक्रमका प्रमुख अतिथि सुदूरपश्चिम प्रदेश सभा सदस्य माननीय तुलसी देवकोटा, विशिष्ट अतिथि एन–फेकोफनका केन्द्रीय अध्यक्ष दानबहादुर बिष्ट, शुक्लाफाँटा नगरपालिका–८ का वडा अध्यक्ष तथा केन्द्रीय सदस्य बहादुरसिंह महरा, सुदूरपश्चिम प्रदेश अध्यक्ष श्याम विष्ट, सल्लाहकार यादव भण्डारी, कैलाली जिल्ला अध्यक्ष विक्रम कुवर, महासचिव डन्डीराज सुवेदी लगायतका अतिथिहरूको उपस्थिति रहेको थियो।
कार्यक्रम सञ्चालन प्रदेश महासचीव तथा सीता सामुदायिक वनका अध्यक्ष पुनाराम चौधरीले गरेका थिए।
कार्यक्रमको सुरुवातमा स्वागत मन्तव्य श्री जानकी सामुदायिक वनका अध्यक्ष चन्द्रप्रकाश भट्टले दिएका थिए।
प्रमुख अतिथि देवकोटाले व्यानर बाचन गर्दै आफ्नो भनाइमा महासंघले सामुदायिक वनका सवालमा उठाएका २५ बुँदे मागहरू यथार्थ र समयानुकूल रहेको बताउँदै ती मागहरूलाई व्यवहारिक रूपमा अघि बढाउन सबै तहका निकाय एकजुट हुनुपर्नेमा जोड दिनुभयो।
उहाँले भन्नुभयो, आन्दोलनमा मात्र निकास खोज्ने होइन, सहमति र सहकार्य गरेरै सामुदायिक वनको हकहित सुनिश्चित गर्नुपर्छ।
देवकोटाले थपिन्, मैले आजै सुदूरपश्चिम प्रदेशका मुख्यमन्त्री कमल शाहलाई भेटेर सहज सहजीकरणका लागि आग्रह गरेकी छु। आगामी २८ गते वार्ताका लागि बोलाइएको छ।
उनले दिगो वन व्यवस्थापन अहिलेको आवश्यकता भएको बताउँदै आफुले लामो समयदेखि सामुदायिक वनको क्षेत्रमा क्रियाशील रहँदै आएको र आगामी दिनमा पनि निरन्तर साथ–सहयोग रहने प्रतिबद्धता जनाइन्।
कार्यक्रमपछि देवकोटाले कृष्णपुर नगरपालिका–९ स्थित सीता सामुदायिक वनमा पुगेर अध्यक्ष पुनाराम चौधरीसहित कार्यसमितिलाई अनुगमन तथा धन्यवाद ज्ञापनसमेत गरिन्।
देवकोटाले भनिन्, सामुदायिक वनको अधिकार, स्रोत र संरचनाको संरक्षणका लागि अब आन्दोलनको तयारी आवश्यक छ। छाता संगठन बलियो भयो भने मात्र सामुदायिक वनको भविष्य सुरक्षित रहन्छ।
अन्य विशिष्ट अतिथिहरूले पनि सामुदायिक वनबीच सहकार्य, नीतिगत सहभागिता र सुशासन प्रवर्द्धनका विषयमा सुझाव र विचार राखेका थिए। सहभागी सामुदायिक वनका अध्यक्षहरूले सान्तिपूर्ण आन्दोलन गर्न तयार रहेको बताउँदै, यदि प्रदेश सरकारले माग सम्बोधन नगरे कडा आन्दोलन गर्ने चेतावनी दिएका थिए।
कार्यक्रमको अन्त्यमा सहभागीहरूले सामुदायिक वनबीच सहकार्य, नीति निर्माणमा प्रभावकारी सहभागिता र सुशासन प्रवर्द्धनका लागि संयुक्त प्रतिबद्धता जनाएका थिए। कार्यक्रम भव्य र सभ्य वातावरणमा सम्पन्न भएको थियो।
आयोजक: सामुदायिक वन उपभोक्ता राष्ट्रिय महासंघ, नेपाल (एन–फेकोफन) व्यवस्थापन: श्री जानकी सामुदायिक वन उपभोक्ता समूह, कृष्णपुर नगरपालिका–९, पिपरिया, कञ्चनपुर
