हेमा भट्ट, कार्तिक २०
कञ्चनपुर जिल्लास्थित सीता सामुदायिक वन उपभोक्ता समूहमा दिगो वन अर्थात् वैज्ञानिक वन व्यवस्थापन कार्ययोजना अनुसार गरिएको कटान कार्यको अनुगमन सम्पन्न भएको छ।
अनुगमन टोलीमा सुदूरपश्चिम प्रदेशसभा सदस्य तथा विशेषाधिकार समितिका सभापति माननीय तुलसी देवकोटा, राष्ट्रिय सामुदायिक वन उपभोक्ता महासंघ, नेपाल (N-FECOFUN) का प्रतिनिधि, सीता सामुदायिक वनका अध्यक्ष पुनाराम चौधरी लगायत सरोकारवालाको सहभागिता रहेको थियो।
अनुगमनपछि माननीय देवकोटाले सीता सामुदायिक वनलाई दिगो र पारदर्शी वन व्यवस्थापनको उत्कृष्ट उदाहरणको रूपमा उल्लेख गर्दै उपभोक्ताहरूको प्रतिबद्धता र सामूहिक प्रयासको उच्च प्रशंसा गर्नुभयो। उहाँले भन्नुभयो —
दिगो वन व्यवस्थापनले स्थानीय समुदायको आर्थिक सशक्तीकरण, वातावरणीय सन्तुलन र सामाजिक विकासमा दीर्घकालीन योगदान पुर्याउँछ।”
त्यस अवसरमा N-FECOFUN का प्रतिनिधिहरूले वैज्ञानिक वन व्यवस्थापनका प्राविधिक पक्ष, कानूनी व्यवस्था र दिगो विकासका अवधारणाबारे विस्तृत जानकारी प्रस्तुत गरे। सहभागीहरूले सीता सामुदायिक वनलाई नमूना वनको रूपमा रूपान्तरण गर्ने दिशामा प्रेरणा मिलेको बताएका थिए।
अनुगमनको अन्त्यमा माननीय देवकोटाले सीता सामुदायिक वनको कार्यप्रगति, पारदर्शिता र सुशासनको खुलेर प्रशंसा गर्दै समुदाय र उपभोक्ताप्रति धन्यवाद व्यक्त गर्नुभयो।
