हेमा भट्ट, कार्तिक २१
कञ्चनपुर — कृष्णपुर नगरपालिकाले हरित जलवायु कोषको सहयोगमा वैकल्पिक ऊर्जा प्रवर्द्धन कार्यक्रम सञ्चालन गर्दै विद्युत चुलो, सुधारिएको चुलो र घरेलु बायोग्यास प्लान्टमा अनुदान उपलब्ध गराउने भएको छ।
नगरपालिकाले स्थानीय उपभोक्ताका लागि स्वच्छ ऊर्जाको प्रयोगलाई प्रोत्साहन गर्ने उद्देश्यले वैकल्पिक ऊर्जा प्रवर्द्धन केन्द्रसँगको सहकार्यमा सो कार्यक्रम ल्याएको हो। इच्छुक स्थानीयवासीले आवश्यक कागजातसहित निर्धारित फाराम भरी २०८२ साल मङ्सिर ४ गतेभित्र सम्बन्धित वडा कार्यालयमार्फत आवेदन दिन सक्ने नगरपालिकाले जनाएको छ।
कार्यक्रमअन्तर्गत विद्युत चुलोमा हरित जलवायु कोषले १५ प्रतिशत, वैकल्पिक ऊर्जा केन्द्रले ५५ प्रतिशत, नगरपालिका र उपभोक्ताले समान १५–१५ प्रतिशत लगानी गर्ने व्यवस्था गरिएको छ। यस्तै, सुधारिएको चुलोमा १५ प्रतिशत हरित जलवायु कोष, ५० प्रतिशत वैकल्पिक ऊर्जा केन्द्र, १५ प्रतिशत नगरपालिका र २० प्रतिशत उपभोक्ताको योगदान रहनेछ। घरेलु बायोग्यास प्लान्टमा क्रमशः २५, ५५, १० र १० प्रतिशतका दरले लगानी हुने उल्लेख छ।
नगरपालिकाका प्रमुख प्रशासकीय अधिकृत खगेन्द्र प्रसाद भट्टका अनुसार स्वच्छ ऊर्जाको प्रयोगले दिगो वातावरणीय संरक्षणका साथै स्थानीयवासीको स्वास्थ्य र जीवनस्तर सुधारमा टेवा पुग्ने अपेक्षा गरिएको छ।
