कञ्चनपुर, कार्तिक २३ — कृष्णपुर नगरपालिकाले आ.व. २०८२/०८३ का लागि विद्यालयस्तरीय पूर्वाधार तथा सुधार सम्बन्धी कार्यक्रमहरू माग गरेको छ।
नगरपालिकाको शिक्षा, युवा तथा खेलकुद शाखाबाट जारी सूचनाअनुसार विद्यालय भवन निर्माण, शौचालय व्यवस्थापन, मर्मत–सम्भार तथा अन्य आवश्यक सुधारका कार्यका लागि विद्यालयहरूले मागपत्र पेश गर्नुपर्नेछ।
नगरपालिकाले जारी गरेको पत्रमा भनिएको छ — “नगरपालिकाको वार्षिक कार्ययोजना अनुसार विद्यालयस्तरका कार्यक्रम छनोट गरी कार्यान्वयन गर्नुपर्ने भएकाले विद्यालयहरूले आफ्ना प्राथमिकता अनुसारका आवश्यकता विवरण पेश गर्न अनुरोध गरिएको छ।”
यसका लागि विद्यालयहरूले आवश्यक कार्यक्रमको नाम, अनुमानित परिमाण, प्राथमिकता क्रम, अनुमानित लागत र कैफियत उल्लेख गरी पत्र प्राप्त भएको मितिले १५ दिनभित्र कृष्णपुर नगरपालिका, शिक्षा, युवा तथा खेलकुद शाखामा बुझाउनुपर्ने नगरपालिकाले जनाएको छ।
नगरपालिकाले यस प्रक्रियामार्फत विद्यालयस्तरमा भौतिक पूर्वाधार सुधारका कार्यक्रमलाई व्यवस्थित रूपमा सञ्चालन गर्ने उद्देश्य लिएको जनाएको छ।
