रैकवार खबर कार्तिक २८
सुदूरपश्चिम प्रदेशमा वन व्यवस्थापनसम्बन्धी उठाइएका २८ बुँदे मागका विषयमा भएको महत्वपूर्ण छलफलपछि आगामी कार्तिक ३० गतेदेखि सुरु गर्न तय गरिएको आन्दोलन स्थगित गरिएको जानकारी आन्दोलन परिचालन समन्वय समितिले संयुक्त प्रेस विज्ञप्ति मार्फत सार्वजनिक गरेको छ।
उद्योग, पर्यटन, वन तथा वातावरण मन्त्रालयका प्रदेश सचिव श्री दिर्घनारायण कोईरालाको अध्यक्षता र माननीय मुख्यमन्त्री कमलबहादुर शाहको प्रमुख आतिथ्यमा सम्पन्न छलफल कार्यक्रममा सरोकारवालासहित व्यापक सहभागिता रहेको थियो। सोही कार्यक्रममा वन उपभोक्ता समूहहरूले प्रस्तुत गरेका माग सम्बोधन गर्न एक महिनाभित्र रिपोर्ट पेश गर्ने गरी १३ सदस्यीय कार्यदल गठन गर्ने निर्णय भएको छ।
कार्यदलको संयोजकमा प्रदेश वन निर्देशक श्री हेमराज बिष्ट रहने भएका छन्। कार्यदलमा साझेदारी वन उपभोक्ता महासंघ नेपाल, सामुदायिक वन उपभोक्ता महासंघ नेपाल (FECOFUN), वैज्ञानिक वन उपभोक्ता राष्ट्रिय महासंघ, वन सम्पदा राष्ट्रिय महासंघ, सामुदायिक समन्वय समिति, नेपाल पत्रकार महासंघ, सामुदायिक वन सहजीकरण समिति, डिभिजनल वन अधिकृत, वन अनुसन्धान तथा प्रशिक्षण केन्द्रका प्रमुख, वन व्यवस्थापन महाशाखा प्रमुख तथा वातावरण महाशाखा प्रमुख श्री भरत बहादुर श्रेष्ठलाई सदस्य–सचिवका रूपमा समावेश गरिएको छ।
कार्यदलले दिगो वन व्यवस्थापन (सिल्भिकल्चर सिस्टम) सम्बन्धी कार्यविधि एक महिनाभित्र तयार गरी स्वीकृत गर्ने तथा २८ बुँदे मागका मुद्दाहरूको समाधानका लागि सुझावसहितको प्रतिवेदन पेस गर्नेछ। प्रदेश सरकारले सो प्रतिवेदनका आधारमा आवश्यक कार्यान्वयन गर्ने लिखित प्रतिबद्धता जनाएपछि आन्दोलन स्थगित गरिएको समितिले स्पष्ट गरेको छ।
आन्दोलन परिचालन समन्वय समितिमा रहेका प्रमुख प्रतिनिधिहरु: पुष्कल बहादुर बम – संयोजक, वैज्ञानिक वन व्यवस्थापन उपभोक्ता राष्ट्रिय महासंघ, सुदूरपश्चिम,यादव प्रसाद भण्डारी – केन्द्रीय सचिव, साझेदारी वन उपभोक्ता महासंघ नेपाल, डण्डीराज सुवेदी – केन्द्रीय महासचिव, N-FECOFUN,जयराज न्यौपाने – सचिव, ओमप्रकाश सापकोटा – अध्यक्ष, मुसुरिया CFCC पुनाराम चौधरी – सामुदायिक वन सहजीकरण समिति, कञ्चनपुर
राम चौधरी – अध्यक्ष, भजनी CFCC, कैलाली
रमेश चौधरी – अध्यक्ष, बसन्त CFCC,समितिले अर्को सूचना नआएसम्म सबै संघर्षका कार्यक्रम रोकिएको जानकारी गराएको छ।
