हेमा भट्ट , कार्तिक २९
धनगढी – तिलक फिल्म्स संस्थाको नवौँ वार्षिकोत्सवको अवसरमा राजधानीमा आयोजित भव्य समारोहमा रोयल शुट हाउस मार्फत स्वदेशी उद्योग, सेवामूलक व्यवसाय तथा सामाजिक क्षेत्रमा उत्कृष्ट योगदान पुर्याउँदै आएका वरिष्ठ युवा उद्यमी तथा समाजसेवी सुरज रैकाज्यूलाई “राष्ट्रिय युवा उद्यमी सम्मान–२०८२” द्वारा सम्मानित गरिएको छ।
दीर्घ समयदेखि उद्यमशीलता, सेवा–सत्कार व्यवसाय, स्वदेशी उत्पादन प्रवर्द्धन तथा समाजसेवामा सक्रिय रैकाज्यूले युवालाई आत्मनिर्भरता, पेशागत अनुशासन र सिर्जनात्मक उद्यमतर्फ प्रेरित गर्दै राष्ट्रनिर्माणमा महत्वपूर्ण भूमिका खेलेका छन्।
समारोहका विशेष अतिथि गणतान्त्रिक नेपालको प्रथम उप–राष्ट्रपति परमानन्द झाले रैकाज्यूको योगदानको प्रशंसा गर्दै, स्वदेशी उद्योग र सामाजिक क्षेत्रमा उनले पुर्याउँदै आएको अग्रणी भूमिकाले युवापुस्तालाई थप प्रेरित गर्ने विश्वास व्यक्त गरे।
त्यसैगरी कार्यक्रमका प्रमुख अतिथि वरिष्ठ शिक्षासेवी कठनेन्दुले उद्यमशीलता विकासमा योगदान पुर्याउने व्यक्तित्वलाई प्रदान गरिने यस्ता सम्मानले समाजमा सकारात्मक सन्देश फैलिने बताए।
कार्यक्रममा तिलक फिल्म्स प्रा.लि.का अध्यक्ष दीपक जोशीले कलाक्षेत्र, समाजसेवा र उद्यमशीलतालाई जोडेर अघि बढ्ने उद्देश्यका साथ नयाँ–नयाँ कार्यक्रमहरू सञ्चालनमा ल्याइने जानकारी दिए।
तिलक फिल्म्स प्रा.लि.ले सुरज रैकाज्यूको उच्चतम योगदानप्रति कृतज्ञता व्यक्त गर्दै, भविष्यमा देशले उहाँबाट अझ धेरै योगदान प्राप्त गर्ने अपेक्षा राखेको जनाएको छ। संस्थाले रैकाज्यूको उज्ज्वल भविष्य तथा निरन्तर प्रगतिका लागि शुभकामना व्यक्त गरेको छ।
