हेमा भट्ट, मंसिर ६
धनगढी, कैलाली — नेपाली कम्युनिष्ट पार्टीले मंसिर १२ गते धनगढीमा आयोजना गर्न लागेको पार्टी एकता सन्देश सभालाई भव्य रूपमा सम्पन्न गर्ने तयारीलाई तीव्र बनाएको छ।
सुदूरपश्चिम प्रदेश संगठन कमिटीले मंसिर ६ गते धनगढीमा तयारी तथा समन्वय बैठक सम्पन्न गरेको छ। बैठकमा प्रचार–प्रसार, जनसक्रियता, कार्यक्रम व्यवस्थापन र सुरक्षा संयोजन लगायतका विषयमा व्यवहारिक सुझाव तथा सिफारिसहरू आदान–प्रदान गरिएको पार्टीले जनाएको छ।
संगठनभित्र एकताको भावना सुदृढ गर्दै आगामी राजनीतिक कार्यदिशाबारे स्पष्ट सन्देश प्रवाह गर्नु सभाको मुख्य उद्देश्य रहेको बताइएको छ।
बैठक लिलामणी पोखरेलको अध्यक्षतामा सम्पन्न भएको थियो भने कार्यक्रमको सञ्चालन नेता खगराज भट्टले गरेका थिए। बैठकमा प्रमुख अतिथि भिम रावलसहित भानुभक्त जोशी, मीनराज बडु, ईश्वर सिंह लगायतका जिम्मेवार नेताहरूले मार्गदर्शन प्रदान गरेका थिए।
सो अवसरमा स्वागत मन्तव्य भानुभक्त जोशीले दिएका थिए। सभामा सुदूरपश्चिमका विभिन्न जिल्लाबाट उल्लेखनीय संख्यामा नेता, कार्यकर्ता तथा समर्थकहरूको सहभागिता रहने अपेक्षा गरिएको छ।
प्रमुख अतिथि भिम रावलले कार्यक्रमको महत्वलाई जोड्दै पार्टी एकता सुदृढ पार्न र संगठनात्मक मजबुतीका लागि सबै पक्षको सक्रिय सहभागिता आवश्यक रहेको बताएका छन्।
संगठनका जिम्मेवार नेताहरूका अनुसार मंसिर १२ गते हुने सन्देश सभामा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ सहित शीर्ष नेताहरूको विशेष उपस्थिति रहनेछ। पार्टीले एकता अभियानको सुरुवात सुदूरपश्चिमबाट नै गर्दै देशव्यापी संगठनात्मक सुदृढीकरणका लागि स्पष्ट राजनीतिक सन्देश प्रवाह गरिने जानकारी दिइएको छ।
