मंसिर १०, कैलाली ।
सुदूरपश्चिम प्रदेशका मुख्यमन्त्री कमल बहादुर शाहले प्रदेशको आर्थिक रुपान्तरणलाई तीव्रता दिन ‘निजी क्षेत्र अपरिहार्य साझेदार’ भएको स्पष्ट संकेत गरेका छन्। लम्कीचुहा–६ मा बुधबार सुरु भएको लम्की महोत्सव–२०८२ को उद्घाटन समारोहलाई सम्बोधन गर्दै उनले विकासका सबै क्षेत्र निजी क्षेत्रसँगको सहकार्यबिना अगाडि बढ्न नसक्ने बताए।
“सम्मुन्त लम्कीचुहाको आधार–कृषि, शिक्षा, पर्यटन, उद्योग र व्यापार” भन्ने नारासहित सुरु भएको महोत्सवमा मुख्यमन्त्री शाहले प्रदेश सरकार नीतिगत तथा कानुनी सुधारका काममा निजी क्षेत्रसँगै अघि बढ्न तयार रहेको दोहोर्याए।
“कानुनी अवरोध हटाएर लगानीमैत्री वातावरण बनाउने हाम्रो स्पष्ट लक्ष्य हो,” उनले भने, “प्रदेश सरकार निजी क्षेत्र, उद्योग वाणिज्य संघ, दातृ निकाय र विकास साझेदारहरूसँग निरन्तर संवादमै छ।”
लगानी सम्मेलन–२०८२ : सुदूरपश्चिमलाई ‘नयाँ गन्तव्य’ बनाउने तयारी- मुख्यमन्त्री शाहले आगामी लगानी सम्मेलन–२०८२ लाई सुदूरपश्चिममा राष्ट्रिय तथा अन्तर्राष्ट्रिय पूँजी भित्र्याउने महत्वपूर्ण अवसरका रूपमा व्याख्या गरे। सम्भावित लगानीकर्तासँग निरन्तर छलफल भइरहेको उल्लेख गर्दै उनले सम्मेलनले प्रदेशको स्रोत, सम्भावना र अवसरलाई वैश्विक मञ्चमा प्रस्तुत गर्ने विश्वास व्यक्त गरे।
प्रदेशको पर्यटन सम्भावना उल्लेख गर्दै मुख्यमन्त्री शाहले खप्तडलाई अन्तर्राष्ट्रिय स्तरमा चिनाउन प्रदेश सरकारले विशेष पहल गरिरहेको जानकारी दिए। उनका अनुसार बाबा रामदेवसहितका व्यक्तित्व तथा विदेशी दूताबासहरूसँग संवाद र समन्वय जारी छ। मनसखण्ड सम्मेलनमार्फत धार्मिक–सांस्कृतिक महत्व उठान तर्फ पनि सरकार अग्रसर रहेको उनले बताए।
उनका अनुसार लम्की–बरेली ट्रान्समिटर लाइन को प्रक्रिया तीव्र गतिमा चलिरहेको छ।
भारत भ्रमणका क्रममा भारतीय केन्द्रीय मन्त्री तथा सीमावर्ती प्रदेशका मुख्यमन्त्रीसँग पर्यटन र सीमा–क्षेत्रका विकासबारे सकारात्मक कुराकानी भएको उनले बताए।
भाद्र २३–२४ को आन्दोलनपछि सरकारले सुशासन र भ्रष्टाचारविरुद्ध कडा कदम चालिरहेको दाबी गर्दै मुख्यमन्त्री शाहले सार्वजनिक क्षेत्र सुधारका विभिन्न पहल अघि बढाइएका छन् भने।
डुडेझारी औद्योगिक क्षेत्र प्रदेशको दीर्घकालीन औद्योगिक योजना भएको उल्लेख गर्दै उनले सो क्षेत्रको विकासका लागि बजेट विनियोजन भइसकेको जानकारी दिए।
बन मन्त्रालयका पदाधिकारीलाई स्थलगत अनुगमनमा पठाइसकिएको उल्लेख गर्दै उनले सडक, बत्ती, खानेपानी लगायतका सबै पूर्वाधार प्रदेश सरकारले नै व्यवस्थित रूपमा उपलब्ध गराउने आश्वासन दिए।
लम्की महोत्सव–२०८२ ले यस वर्ष कृषि, शिक्षा, उद्योग, पर्यटन र व्यापारका सम्भावनाका विषयमा प्रदेश नेतृत्वका प्राथमिकता झल्काएको छ। मुख्यमन्त्री शाहको भाषणले सरकार र निजी क्षेत्रबीचको सहकार्यलाई आगामी वर्षहरूमा सुदूरपश्चिम विकासको ‘मुख्य सूत्र’ बन्ने संकेत दिएको छ।
