लम्कीचुहामा सिटी हल र संग्रहालयको शिलान्यास : ‘सन्तुलित बजेट’ मुख्य एजेन्डा—मुख्यमन्त्री शाह
कैलाली, मंसिर १०
सुदूरपश्चिम प्रदेशका मुख्यमन्त्री कमल बहादुर शाहले प्रदेश विकासमा ‘सन्तुलित बजेट’ नै अबको मुख्य आवश्यकता भएको बताएका छन्। बुधबार लम्कीचुहा–४ मा निर्माण हुन लागेको सिटी हल, संग्रहालय तथा घेरापर्खाल निर्माण कार्यको शिलान्यास गर्दै मुख्यमन्त्री शाहले पहाड–तराईबीचको विकास असमानता घटाउन सरकार जिम्मेवार हुने स्पष्ट सन्देश दिए।
सातै जिल्लाको स्थलगत निरीक्षण सम्पन्न गरेको भोलिपल्टै सार्वजनिक कार्यक्रममा उभिएका शाहले विकट पहाडी क्षेत्रहरू—विशेषगरी बाजुरा र बझाङ—लाई विकासको मुख्य केन्द्रमा राख्ने प्रतिवद्धता दोहोर्याए। “तराईले तीव्र प्रगति गरेको छ, अब विकास पहाडी बस्ती र दुर्गम क्षेत्रतर्फ मोडिनुपर्छ,” भन्दै उनले प्रदेशको प्राथमिकतामा ‘भौगोलिक सन्तुलन’ रहने उल्लेख गरे।
कार्यक्रममा मुख्यमन्त्री शाहले शिक्षा, स्वास्थ्य, खानेपानीलगायतका ठूला आयोजनाहरू समेत चाँडै शिलान्यास र उद्घाटनको चरणमा प्रवेश गर्न लागेको जानकारी दिए। संग्रहालयलाई प्रभावकारी रूपमा सञ्चालन गर्न स्थानीय तहदेखि सरोकारवालासम्म सबै संयमित र जिम्मेवार हुनुपर्नेमा उनले जोड दिए।
लम्कीचुहामा बन्न लागेको सिटी हल, संग्रहालय तथा पर्खाल निर्माण प्रदेश सरकारको बजेटमा अघि बढाइएको परियोजना हो। निर्माण कार्यका लागि गोरखनाथ–पूर्वपश्चिम–निधि जेभी, काठमाडौंसँग १३ करोड १९ लाख ३ हजार २१४ रुपैयाँ ७ पैसामा ठेक्का सम्झौता गरिएको छ भने परियोजनाको कुल लागत २२ करोड ८९ लाख १७ हजार ७ रुपैयाँ ५६ पैसा रहने छ।
बहुउद्देश्यीय प्रयोगका लागि डिजाइन गरिएको सिटी हलबाट सार्वजनिक सभा, सांस्कृतिक कार्यक्रम, प्रदर्शनी तथा विभिन्न सामुदायिक गतिविधि सञ्चालनमा सहजता हुने विश्वास स्थानीयले व्यक्त गरेका छन्। निर्माण कार्य २०८४ असोज ३० भित्र सम्पन्न गर्ने लक्ष्य तोकिएको छ।
