हेमा भट्ट, ११ मंसिर
धनगढी, मंसिर १२आगामी मंसिर १२ गते धनगढीमा आयोजना हुन लागेको नेपाली कम्युनिस्ट पार्टीको एकता सन्देश सभाका तयारीबारे जानकारी गराउन आज धनगढीमा पत्रकार सम्मेलन सम्पन्न गरिएको छ। पत्रकार सम्मेलनमा पार्टीका वरिष्ठ नेता डा. भीम रावलसहित स्थानीय तथा केन्द्रीय नेताहरूको उपस्थिति रहेको थियो।
सभाको तयारी अन्तिम चरणमा पुगेको आयोजक समितिले जनाएको छ। साविक माओवादी केन्द्रको कार्यालयमा बसेको पत्रकार सम्मेलनमा धनगढीलाई एकता सन्देश उद्घोष गर्ने मुख्य राजनीतिक थलोका रूपमा तयार पारिएको जानकारी दिइयो।
पार्टी नेता डा. रावलले एकता सन्देश सभाले मुलुकको समग्र राजनीतिक दिशालाई सकारात्मक मोड दिने विश्वास व्यक्त गर्दै भने—
“देश गम्भीर चुनौतीबाट गुज्रिरहेको छ। अहिलेको आवश्यकता विभाजन होइन, वामशक्तिको दृढ एकता र जनताको मुद्दामा केन्द्रित स्पष्ट आन्दोलन हो। धनगढीको सभाले यही सन्देश देशभर पुर्याउनेछ।”
उनका अनुसार तयारीमा जनसहभागिता उत्साहजनक रहेको र विभिन्न सामाजिक–राजनीतिक संगठनहरू पनि सक्रिय रूपमा जुटिरहेको बताए।
रावलले अगाडि थपे—
“देशलाई स्थिरता र समृद्धितिर लैजान एकता अपरिहार्य छ। हामीले यही प्रतिवद्धता लिएर सभाको तयारी गरिरहेका छौँ।”
आयोजकका अनुसार सभामा प्रदेशका आठै जिल्लाबाट प्रतिनिधित्व हुने अपेक्षा गरिएको छ।
