हेमा भट्ट,माघ ४
कञ्चनपुर – कञ्चनपुरको राजघाट खेलमैदानमा माघ ३ र ४ गते आयोजना गरिएको विशेष माघी मिलन तथा वृहत् सांस्कृतिक कार्यक्रम–२०८२ (थारू सम्वत् २६४९) सफलतापूर्वक सम्पन्न भएको छ। कार्यक्रममा थारू समुदायको मौलिक सांस्कृतिक पहिचान संरक्षण र प्रवर्द्धन गर्ने उद्देश्यका साथ स्थानीय र राष्ट्रिय कलाकारहरूको प्रतिभा प्रदर्शन गराइएको थियो।
दुई दिनसम्म चलेको यस सांस्कृतिक महोत्सवको उद्घाटन बिहान ११ बजे भएको थियो। महोत्सवमा सांगीतिक प्रस्तुति, पारम्परिक नृत्य, रंगीन थारू पोशाकमा प्रस्तुति र सांस्कृतिक झाँकीले उपस्थित दर्शकहरूलाई मन्त्रमुग्ध बनाएको थियो। कार्यक्रममा उपस्थित स्थानीय, राष्ट्रिय तथा थारू सांस्कृतिक कलाकारहरूले आफ्नो प्रतिभा प्रस्तुत गर्दै सांस्कृतिक विविधता र मौलिकताको झल्को प्रस्तुत गरेका थिए।
समापन समारोहका प्रमुख अतिथि, कृष्णपुर नगरपालिका उपप्रमुख द्रौपदी रानाले कार्यक्रममा सहभागी सबैमा धन्यवाद व्यक्त गर्दै आगामी वर्ष कार्यक्रम पाँच दिनसम्म सञ्चालन गर्ने योजना रहेको जानकारी गराइन्। उनले भनिन्,हामीले हाम्रो सांस्कृतिक विविधता र मौलिकता जोगाउँदै युवा पुस्तालाई हाम्रो पहिचानमा गर्व महसुस गराउन चाहन्छौं। नगरपालिकाले यसमा पूर्ण सहयोग गर्नेछ र हाम्रो तर्फबाट पनि कार्यक्रमको समृद्धिमा योगदान जारी राखिनेछ।
कार्यक्रमका विशिष्ट अतिथि, कृष्णपुर नगरपालिका वडा नं. ९ अध्यक्ष कैलाश बलायरले कार्यक्रमको सफलता र योगदानको प्रशंसा गर्दै भने,हाल दुई दिनको कार्यक्रम भए तापनि अर्को वर्ष पाँच दिनसम्म भव्यरूपमा आयोजना गर्नेछौं। यसले हाम्रो सांस्कृतिक पहिचानलाई अझ प्रबर्द्धन गर्नेछ। यस किसिमका कार्यक्रमले स्थानीय युवाहरूमा सांस्कृतिक चेतना बढाउने मात्र नभई पर्यटन र अर्थतन्त्रमा समेत योगदान पुर्याउँछ। सहयोग गर्ने सबै व्यक्तित्व, संस्था र दाताहरूप्रति म हार्दिक आभार प्रकट गर्दछु।
कार्यक्रमका सभापति निरज भण्डारीले सहयोगी हात, भावना र संस्था–सामुदायिक वन, देश–विदेशका दाताहरूमाथि विशेष आभार व्यक्त गरे। कलाकार ल्याउन सहयोग गर्ने साथीहरू, स्थानीय भलमन्साहरू जस्तै ओमप्रकाश चौधरी र उनका दाजुभाइहरूले विदेशबाट सिकेर स्काई फोल्डिङको व्यवस्था गर्दै आफ्नै सामग्री प्रयोग गरी स्टेज निर्माणमा योगदान दिएका थिए। आयोजकहरूले यस योगदानको खुलेर प्रशंसा गरेका थिए।
कार्यक्रममा उपस्थित दर्शकहरूले नाच, गीत र सांस्कृतिक प्रस्तुति हेरेर अत्यन्त खुशी व्यक्त गरे र आगामी वर्ष अझ भव्य र आकर्षक बनाउने सुझाव दिएका थिए। आयोजकहरूले बताए अनुसार, कार्यक्रमले स्थानीय समुदायमा उत्साह, खुशी र सांस्कृतिक चेतना जगाउन महत्वपूर्ण भूमिका खेलेको छ।
यस सांस्कृतिक महोत्सवले थारू सांस्कृतिक पहिचानको संरक्षण मात्र नभई स्थानीय पर्यटन, सामाजिक मेलमिलाप र आर्थिक क्रियाकलापमा पनि योगदान पुर्याएको छ। आगामी वर्ष कार्यक्रम पाँच दिनसम्म आयोजना गर्न तयारी भैरहेको छ र थप दातृ संस्था तथा साझेदारहरूलाई पनि सहभागी गराउने योजना गरिएको छ।
कार्यक्रमले थारू समुदायको मौलिक नृत्य, गीत, पोशाक र सांस्कृतिक विविधतालाई नयाँ पुस्तासमक्ष प्रस्तुत गर्ने उत्कृष्ट अवसर प्रदान गरेको छ। सहभागी कलाकार, दर्शक र सहयोगीहरूले आगामी वर्ष कार्यक्रमलाई अझ भव्य, जीवन्त र व्यवस्थित बनाउने साझा प्रतिबद्धता व्यक्त गरेका छन्।
राजघाटमा सम्पन्न यो सांस्कृतिक महोत्सवले थारू पहिचानको गौरव, सांस्कृतिक चेतना र पर्यटन प्रवर्द्धनमा एउटा नयाँ अध्याय थपेको छ।
