माओवादी उम्मेदवार विष्णु प्रकाश उपाध्यायको पक्षमा भव्य भेटघाट कार्यक्रम सम्पन्न

हेमा भट्ट, माघ २०
कञ्चनपुर — नेपाल कम्युनिस्ट पार्टी (माओवादी केन्द्र) कञ्चनपुर निर्वाचन क्षेत्र नम्बर–३ बाट प्रतिनिधि सभा सदस्य पदका उम्मेदवार विष्णु प्रकाश उपाध्याय (क. विपि) को पक्षमा आयोजित भेटघाट तथा परिचयात्मक कार्यक्रम भव्य र उत्साहपूर्ण वातावरणमा सम्पन्न भएको छ।
महेन्द्रनगरस्थित Hotel 9/11 मा सम्पन्न कार्यक्रममा राजनीतिक कार्यकर्ता, बुद्धिजीवी, युवा, श्रमिक, महिला तथा सर्वसाधारणको उल्लेख्य सहभागिता रहेको थियो। जनताको सक्रिय उपस्थिति, सकारात्मक ऊर्जा र राजनीतिक चेतनाले कार्यक्रमलाई प्रभावशाली बनाएको सहभागीहरूको भनाइ थियो।
कार्यक्रमलाई सम्बोधन गर्दै उम्मेदवार उपाध्यायले देशमा विद्यमान असमानता, बेरोजगारी, भ्रष्टाचार र सामाजिक विभेदको अन्त्यका लागि निर्णायक परिवर्तन आवश्यक रहेको बताए। सामाजिक न्याय, राष्ट्रिय स्वाधीनता र आत्मनिर्भर अर्थतन्त्र माओवादी आन्दोलनको मूल मर्म भएको उल्लेख गर्दै उनले त्यसलाई व्यवहारमा उतार्ने उद्देश्यसहित आफू चुनावी प्रतिस्पर्धामा उत्रिएको स्पष्ट पारे।
“आजको आवश्यकता केवल सत्ता परिवर्तन होइन, जनजीवनको रूपान्तरण हो,” उपाध्यायले भने, “श्रमिक, किसान, युवा र उत्पीडित वर्गको अधिकार सुनिश्चित गर्नु हाम्रो ऐतिहासिक दायित्व हो।”
कार्यक्रममा बोल्ने वक्ताहरूले उपाध्यायलाई संघर्षशील, ऊर्जावान र बौद्धिक युवा नेतृत्वका रूपमा चित्रण गर्दै कञ्चनपुर–३ का जनताको सशक्त आवाज बन्न सक्ने उम्मेदवार भएको धारणा व्यक्त गरे। जनआन्दोलन, राजनीतिक संघर्ष र सामाजिक अभियानमा उनको सक्रिय अनुभव नै सबैभन्दा ठूलो शक्ति भएको उनीहरूको भनाइ थियो।
वक्ताहरूले आगामी निर्वाचनमा गुलाफ चिन्ह मा मतदान गरी माओवादी केन्द्रलाई विजयी गराउन आग्रह गर्दै भने, “यो चुनाव व्यक्ति मात्र होइन, विचार, परिवर्तन र भविष्य जित्ने अवसर हो।”
कार्यक्रमभरि “विश्वका श्रमिकहरू एकजुट होऔँ”, “एकीकृत जनक्रान्ति जिन्दावाद” र “सामाजिक न्याय, स्वाधीनता र आत्मनिर्भरता हाम्रो लक्ष्य” जस्ता नाराले माहोल गुञ्जायमान बनेको थियो। युवाहरूको उत्साह, जनताको भरोसा र राजनीतिक प्रतिबद्धताले कार्यक्रमलाई थप सशक्त बनाएको सहभागीहरूले बताएका छन्।
अन्त्यमा उम्मेदवार उपाध्यायले कञ्चनपुर–३ का जनतासँग प्रत्यक्ष संवाद गर्दै इमानदार राजनीति, जवाफदेही नेतृत्व र जनमुखी विकास आफ्नो प्रमुख एजेन्डा भएको दोहोर्‍याए। जनताको विश्वास र साथ प्राप्त भएमा क्षेत्रको समग्र विकास, रोजगारी सिर्जना र सामाजिक न्यायका लागि निरन्तर लाग्ने प्रतिबद्धता उनले व्यक्त गरे।