धनबहादुर बिक
पुनर्वास, १३ फागुन
सुदूरपश्चिमको शैक्षिक धरोहरका रूपमा स्थापित जनता क्याम्पस पुनर्वास ले २४औँ वार्षिकोत्सव उत्साह, ऊर्जा र सकारात्मक संकल्पका साथ मनाएको छ। त्रिभुवन विश्वविद्यालय सम्बन्धन प्राप्त यस क्याम्पसले दुई दशकभन्दा लामो यात्रामा हजारौँ विद्यार्थीको भविष्य निर्माण गर्दै स्थानीय स्तरमै उच्च शिक्षाको बलियो आधार तयार गरेको छ।
२०५८ साल साउन १५ गते केही दूरदर्शी शिक्षाप्रेमी र समाजसेवीहरूको अठोटबाट सुरु भएको यो अभियान आज क्षेत्रकै शैक्षिक केन्द्रका रूपमा स्थापित भएको छ। सुरुवातमा मानविकी संकायबाट आरम्भ गरिएको अध्ययन अहिले मानविकी, शिक्षाशास्त्र र व्यवस्थापनसम्म विस्तार भइसकेको छ। सीमित स्रोत–साधनका बीच पनि निरन्तर विस्तार र स्तरोन्नति क्याम्पसको प्रतिबद्धताको प्रमाण बनेको छ।
वार्षिकोत्सव समारोहमा प्रस्तुत वार्षिक प्रतिवेदनले उपलब्धि मात्र होइन, आगामी योजनाको स्पष्ट खाका पनि प्रस्तुत गर्यो। खेलमैदान, पुस्तकालय भवन, सभाहल, सुरक्षा पर्खाल र आधारभूत पूर्वाधार विस्तारजस्ता विषयलाई प्राथमिकतामा राख्दै क्याम्पसले अब भौतिक तथा शैक्षिक सुधारको नयाँ चरणमा प्रवेश गर्ने संकेत दिएको छ।
आर्थिक पारदर्शितालाई पनि क्याम्पसले प्राथमिकतामा राखेको देखियो। आर्थिक वर्ष २०८२ असार मसान्तसम्म २२ लाख २७ हजार ८६८ रुपैयाँ आम्दानी र २१ लाख ५५ हजार ६०९ रुपैयाँ खर्चको विवरण सार्वजनिक गर्दै सुशासनप्रति प्रतिबद्धता दोहोर्याइएको थियो।
कार्यक्रमका प्रमुख अतिथि पुनर्वास नगर प्रमुख तोय प्रसाद शर्माले क्याम्पसको उन्नतिका लागि नगरपालिका सधैँ सहकार्य गर्न तयार रहेको स्पष्ट प्रतिबद्धता व्यक्त गर्नुभयो। उहाँले क्याम्पसको शैक्षिक गुणस्तर अभिवृद्धिका लागि सबै सरोकारवालाको साझा प्रयास आवश्यक रहेको बताउनुभयो।
समारोहमा दीर्घकालीन योगदान पुर्याएका पूर्व क्याम्पस प्रमुख कर्णबहादुर बुढा र लेखा कर्मचारी होमनाथ चापागाईंलाई सम्मान गरिएको थियो। विद्यार्थीहरूको सांस्कृतिक प्रस्तुति र उत्साहपूर्ण सहभागिताले समारोहलाई थप उल्लासमय बनाएको थियो।
हाल १८ जना शिक्षण–प्रशासनिक जनशक्तिसहित सञ्चालनमा रहेको क्याम्पसले आगामी दिनमा अझ गुणस्तरीय शिक्षा, व्यवस्थित पूर्वाधार र दीगो विकासको लक्ष्यसहित अघि बढ्ने प्रतिबद्धता जनाएको छ।
२४ वर्षको संघर्ष, समर्पण र सफलताको यो यात्रा अब नयाँ उचाइतर्फ उन्मुख भएको छ—जनताको साथ, शिक्षकको योगदान र स्थानीय सरकारको सहकार्यसँगै जनता क्याम्पस पुनर्वास अब अझ मजबुत शैक्षिक केन्द्र बन्ने विश्वास व्यक्त गरिएको छ।
