रुकुम पूर्व – रुकुम पूर्व जिल्लाको भूमे गाउँपालिका-३ मा सीमा हरियाली युवा क्लबको आयोजनामा खुला भलिबल प्रतियोगिता आज (साउन १७) देखि औपचारिक रूपमा सुरु भएको छ। प्रतियोगिता साउन २३ गतेसम्म सञ्चालन हुने आयोजकले जनाएको छ।
प्रतियोगिताको उद्घाटन स्थानीय जनप्रतिनिधि, समाजसेवी, खेलप्रेमी तथा स्थानीय बासिन्दाको उल्लेखनीय उपस्थितिमा गरिएको थियो। उद्घाटन समारोहमा वक्ताहरूले खेलकुदले युवालाई अनुशासित, स्वस्थ, सिर्जनशील र सकारात्मक मार्गमा अघि बढाउन महत्वपूर्ण भूमिका खेल्ने उल्लेख गर्दै यस्ता प्रतियोगिताले स्थानीय प्रतिभाको पहिचान र विकासमा ठूलो योगदान पुग्ने विश्वास व्यक्त गरे।
सीमा हरियाली युवा क्लबका पदाधिकारीका अनुसार युवामा खेलकुदप्रतिको आकर्षण बढाउने, गाउँ-समाजमा आपसी सद्भाव, एकता र भाइचाराको भावना मजबुत बनाउने तथा लुकेर रहेका प्रतिभाशाली खेलाडीलाई उजागर गर्ने उद्देश्यले प्रतियोगिताको आयोजना गरिएको हो।
प्रतियोगितामा भूमे गाउँपालिकाका विभिन्न वडा तथा आसपासका पालिका र जिल्लाका टोलीहरूको सहभागिता रहनेछ। प्रत्येक खेल प्रतिस्पर्धात्मक र रोमाञ्चक हुने अपेक्षा गरिएको आयोजकको भनाइ छ। प्रतियोगिताले स्थानीय खेलाडीलाई आफ्नो क्षमता प्रदर्शन गर्ने अवसर प्रदान गर्नुका साथै खेल संस्कृतिको विकासमा समेत टेवा पुग्ने विश्वास गरिएको छ।
प्रतियोगितामा उत्कृष्ट प्रदर्शन गर्ने विजेता तथा उपविजेता टोलीलाई नगद पुरस्कार, ट्रफी, मेडल र प्रमाणपत्र प्रदान गरिनेछ। साथै उत्कृष्ट खेलाडी, उत्कृष्ट सर्भर, उत्कृष्ट स्पाइकरलगायत विभिन्न विधामा पनि विशेष पुरस्कारको व्यवस्था गरिएको आयोजकले जनाएको छ।
स्थानीयवासीले पनि प्रतियोगिताप्रति उत्साहजनक साथ दिएका छन्। खेल मैदानमा दैनिक दर्शकको उल्लेखनीय उपस्थितिको अपेक्षा गरिएको छ। प्रतियोगिताले खेलकुदमार्फत सामाजिक एकता, युवाको नेतृत्व विकास तथा स्वस्थ प्रतिस्पर्धाको वातावरण निर्माणमा सकारात्मक योगदान पुर्याउने विश्वास व्यक्त गरिएको छ।
खुला भलिबल प्रतियोगिता साउन २३ गते हुने फाइनल खेलसँगै पुरस्कार वितरण तथा समापन समारोहका साथ सम्पन्न हुने कार्यक्रम रहेको आयोजकले जनाएको छ।
