हेमा भट्ट, भाद्र १२
काठमाडौं, भाद्र शुक्ल पञ्चमी – आज नेपाली महिलाले अरुन्धतीसहित सप्तऋषिको विधिपूर्वक पूजा गर्दै ऋषि पञ्चमी मनाएका छन्।
महिलाहरू बिहानै उठेर नित्यकर्म सम्पन्न गरी हरितालिकाको व्रत समापन गर्छन्। त्यसपछि नजिकको नदी, खोला, ताल वा पोखरीमा गई दन्त्यवन, गाईको गोबर, माटो र खरानी लगाएर स्नान गर्छन्। बागमती, मनोहरा र रुद्रमतीलगायतका नदी किनारमा पानी स्वच्छ भएकाले धेरै महिला विधिपूर्वक स्नान गर्न आउने गर्छन्।
धार्मिक विश्वास अनुसार रजस्वला दौरान छोइछुई वा त्रुटि भएमा आज सप्तऋषिको पूजा गर्दा पापबाट मुक्ति पाइन्छ। स्नानपछि अरुन्धतीसहित अत्रि, गौतम, भरद्वाज, जमदग्नि, वशिष्ठ, कश्यप र विश्वामित्रको पूजाआजा गरिन्छ।
धर्मशास्त्रविद् प्रा. डा. देवमणि भट्टराईका अनुसार, रजस्वलाको समयमा अरूलाई छोइछुई गर्दा शरीरमा कीटाणु फैलिन सक्छ, जसले रोग निम्त्याउने हुँदा सप्तऋषि पूजा वैज्ञानिक दृष्टिले पनि महत्वपूर्ण छ।
आजको दिन स्नान र पूजापछि अन्न, कागुनो, कन्दमूल र कर्कला खाने व्रतविधि छ। काठमाडौंको टेकु, मूलपानी र देशभरका ऋषेश्वर मन्दिरमा महिला भक्तजनको भिड लाग्ने गर्दछ।
यसैगरी, तीज पर्व पनि आजैबाट समापन भएको छ।
