खेमराज भट्ट, काठमाडौं –
काठमाडौंको बुढानीलकण्ठका श्याम तामाङको जीवनकथा सामान्य छैन। बाल्यकालदेखि नै संघर्षमा हुर्किएका उहाँले परिवारको उज्ज्वल भविष्य र सुरक्षित जीवनका लागि आफ्नो सम्पूर्ण जवानी परदेशको कठोर श्रममा बिताउनुभयो।
श्याम तामाङले रत्नराज्य स्कुलमा अध्ययनरत रहँदादेखि नै जीवनका कठिनाइ भोग्न थाल्नुभएको थियो। साधारण परिवारमा जन्मिएका उहाँलाई अध्ययनसँगै परिवारको दायित्व पनि बोकिनैपर्थ्यो। साथीभाइलाई आदर गर्ने, परिवारलाई माया गर्ने स्वभावले उहाँलाई सधैं संघर्षशील र दृढ बनायाे
उज्यालो भविष्यको खोजीमा उहाँले पहिलो पटक घर छाडेर मलेसिया यात्रा गर्नुभयो। त्यसपछि कतार, दुबई र साउदी अरब—यी सबै मुलुकका कारखाना र कम्पनीहरू उहाँको पसिनाले भिजेका छन्।
मरुभूमिको तातो बालुवादेखि रातको कठोर शिफ्टसम्म, घाम–पानी, थकान र स्वास्थ्य जोखिमसँग जुध्दै उहाँले अनगिन्ती दिन बिताउनुभयो।
श्याम भावुक हुँदै भन्छन् बालबच्चाले पढोस, परिवारलाई स्वास्थ्य सेवा मिलोस भनेर मैले सहनुपरेको पीडा भन्दा ठूलो केही छैन। यो सबै मैले केवल मेरो परिवारकै उज्ज्वल भविष्यका लागि सहँदै आएको हुँ।
परदेशबाट पठाएको पैसाले घरमा शिक्षा र स्वास्थ्य सजिलो भए पनि नदेखिएको छोरा छोरीको हाँसो, नछुटेको तीज–दशैं, र नस्पर्शिएको परिवारको मायाले उहाँलाई हरेक दिन चिर्ने गरेको छ। उहाँ भन्छन्—धन त ल्याइन्छ,तर परिवारसँग बिताउनुपर्ने मिठा पल कहिल्यै फर्केर आउँदैनन्। असली सुख भनेको आफ्नो परिवारसँगै हाँस्न पाउनु हो।
विदेशमा रहँदा पनि श्यामले साथीभाइ र सहकर्मीलाई सधैं आदर गर्नुभयो। नयाँ ठाउँमा साथीलाई परिवारजस्तै व्यवहार गर्दा उहाँ ‘आदर्श कामदार’का रुपमा चिनिनुभयो।
काममा सधैं इमान्दारी, व्यवहारमा सरलता र आत्मीयताका कारण उहाँले सयौं साथीलाई प्रेरणा दिनुभयो।
आज फेरि श्याम युरोप जाने तयारीमा हुनुहुन्छ। देशमै केही गर्न सकिन्छ भन्ने चाहना उहाँमा छ तर कठोर यथार्थ—आर्थिक आवश्यकता र अवसरको कमी—ले फेरि परदेश धकेलिरहेको छ।
तर, उहाँ निराश हुनुहुन्न। उहाँ दृढ विश्वास राख्नुहुन्छ—मेहनत, इमान्दारी र नयाँ सोचले जीवन अझ उज्यालो बनाउन सकिन्छ।
परदेश जाने तयारी गर्ने नयाँ पुस्तालाई उहाँको सन्देश विशेष छ।
“परदेश जानु सजिलो छैन, त्यहाँ दुःख–कष्ट छ। तर लक्ष्यसहित अघि बढ्नुपर्छ। आफ्नो परिवार र देशलाई सम्झेर इमान्दारीले गरेको श्रम नै साँचो सम्पत्ति हो।”
श्यामको कथा केवल व्यक्तिगत पीडा र त्याग मात्र होइन, सम्पूर्ण नेपाली कामदारको साझा कथा हो। लाखौं नेपाली युवाले जस्तै उहाँले पनि जीवनको मधुर समय परदेशको मजदुरीमा बिताउनु परेको छ।
परिवारप्रतिको अथाह माया, साथीप्रतिको सम्मान र समाजप्रतिको योगदानका कारण श्याम तामाङ आज केवल आफ्नो परिवारका लागि मात्र होइन, सम्पूर्ण समाजका लागि पनि संघर्षको प्रतिमूर्ति बनेका छन्।
हामी सबैको हृदयदेखि यही कामना छ— उहाँको आगामी जीवन यात्रा अझ सफल होस्, उहाँले देखेका सपना पूरा होस्। श्री पशुपतिनाथको आशिर्वाद सधैं उहाँ र उहाँको परिवारमाथि रहोस्।
परिवारको भविष्यका लागि आफ्नो जवानी परदेशको कठोर श्रममा बिताएका श्याम तामाङ (फाइल तस्बिर)
