माघ २०
पीएम कप काठमाडौं जिल्ला पुरुष छनोट क्रिकेट प्रतियोगिता २०८२ अन्तर्गत मंगबलार सम्पन्न पछिल्ला तीन खेलहरूमा ग्रेट हिमालय क्रिकेट एकेडेमी, थर्ड आई युथ क्लब र बालुवाटार क्रिकेट क्लबले जित हात पारेका छन्।
ग्रेट हिमालय क्रिकेट एकेडेमीले एञ्जेल्स स्पोर्ट्स एकेडेमीलाई ३८५ रनको विशाल अन्तरले पराजित गरेको छ।
पहिले ब्याटिङ गरेको ग्रेट हिमालयले निर्धारित ५० ओभरमा मात्र ४ विकेट गुमाएर ४७४ रनको विशाल योगफल तयार पारेको थियो। टोलीका लागि ईशान पाण्डेले ९१ बलमा १४७ रन र सम्राट शाहले १०६ बलमा १३० रनको उत्कृष्ट शतकीय पारी खेले। खेलको ‘प्लेयर अफ द म्याच’ सम्राट शाह घोषित भए।
४७५ रनको कठिन लक्ष्य पछ्याएको एञ्जेल्स स्पोर्ट्स एकेडेमी ३०.१ ओभरमा मात्र ८९ रनमा समेटियो। एञ्जेल्सलाई सस्तैमा रोक्न ग्रेट हिमालयका प्रकाश थापाले ८.१ ओभरमा १६ रन खर्चेर ५ विकेट लिए।
पाँचौँ खेलमा थर्ड आई युथ क्लबले वन डे क्रिकेट एकेडेमीलाई ३ विकेटले पराजित गर्यो। वन डे क्रिकेट एकेडेमीले ४६ ओभरमा सबै विकेट गुमाएर २२७ रन बनाएको थियो, जसमा रघुनन्दन सिंहले ५६ बलमा अविजित ८१ रनको योगदान दिए। थर्ड आईका बिक्रम केसीले ९ ओभरमा ५३ रन दिएर ४ विकेट लिए।
२२८ रनको लक्ष्य पछ्याएको थर्ड आई युथ क्लबले ४६.१ ओभरमा ७ विकेट गुमाउँदै जित हासिल गर्यो। टोलीका लागि सुरज खड्काले ४० रन र दीपेन्द्र ओझाले ३० रन बनाए। घातक बलिङ गरेका बिक्रम केसी ‘प्लेयर अफ द म्याच’ चुनिए।
अर्को खेलमा बालुवाटार क्रिकेट क्लबले रेडियन्ट क्रिकेट एकेडेमीलाई ९ विकेटले सहजै हराएको छ। पहिले ब्याटिङ गरेको रेडियन्ट ३२ ओभरमा ९२ रनमै अलआउट भएको थियो। रेडियन्टका लागि चन्दन कुमारले २० रन बनाउनु बाहेक अन्य ब्याटर चल्न सकेनन्। बालुवाटारका आतिफ खान र सृजन पाण्डेले २-२ विकेट लिए।
९३ रनको सामान्य लक्ष्य बालुवाटारले मात्र १३.३ ओभरमा १ विकेट गुमाएर पूरा गर्यो। बालुवाटारको जितमा धिरज देउवाले ४१ बलमा विष्फोटक ५९ रनको अविजित पारी खेले। धिरज देउवा नै खेलको ‘प्लेयर अफ द म्याच’ घोषित भए।
