हेमा भट्ट, जेठ २०
कञ्चनपुर – भीमदत्त नगरपालिका अन्तर्गत होली फेम्ली माध्यमिक विद्यालयको खेल मैदानमा जारी एन-७२० क्रिकेट प्रतियोगिता २०८३ दिनप्रतिदिन थप रोमाञ्चक बन्दै गएको छ। आज सम्पन्न दुई क्वाटरफाइनल खेलले प्रतियोगिताको स्तर, प्रतिस्पर्धात्मकता र युवा खेलाडीहरूको क्षमता उजागर गरेको छ। रोमाञ्चक संघर्षपूर्ण खेलपछि होली फेम्ली माध्यमिक विद्यालय र शान्ति निकेतन विद्यालय सेमिफाइनलमा प्रवेश गर्न सफल भएका छन्।
पहिलो क्वाटरफाइनल खेलमा होली फेम्लीले वेस्टन पब्लिक स्कुलमाथि १ विकेटको कठिन जित निकाल्दै अन्तिम चारमा स्थान सुरक्षित गर्यो। खेल सुरुदेखि नै प्रतिस्पर्धात्मक बनेको थियो। टसपछि ब्याटिङ गरेको वेस्टनले निर्धारित २० ओभरमा १०७ रन बनाउँदै चुनौतीपूर्ण लक्ष्य प्रस्तुत गरेको थियो। लक्ष्य सामान्य देखिए पनि वेस्टनका बलरहरूले नियमित अन्तरालमा विकेट लिँदा होली फेम्ली दबाबमा परेको थियो।
तर कठिन परिस्थितिमा आकाश विष्टले जिम्मेवारीपूर्ण ब्याटिङ गर्दै ३८ बलमा ३६ रन बनाए। कप्तान हरिम बुढाले १७ रन र तपन अवस्थीले महत्वपूर्ण १३ रन जोड्दै टोलीलाई जिततर्फ डोर्याए। खेल अन्तिम क्षणसम्म पुगेको थियो र होली फेम्लीले १९.३ ओभरमा ९ विकेट गुमाएर लक्ष्य पूरा गर्दै रोमाञ्चक जित हात पार्यो।
वेस्टनका पुष्प पन्त र कपिल भट्टले समान ३-३ विकेट लिएर खेललाई अन्तिमसम्म खुला राखेका थिए। उनीहरूको उत्कृष्ट बलिङका बाबजुद होली फेम्लीले संयम र धैर्यता कायम राख्दै जित सुनिश्चित गर्यो।
यस खेलका सबैभन्दा प्रभावशाली खेलाडी भने तपन अवस्थी बने। उनले बलिङमा ४ ओभरमा मात्र १७ रन खर्चेर ६ विकेट लिएर विपक्षी ब्याटिङलाई ध्वस्त पारे। त्यसपछि ब्याटिङमा पनि महत्वपूर्ण योगदान दिँदै टोलीको जितमा निर्णायक भूमिका खेले। उत्कृष्ट अलराउण्ड प्रदर्शनका कारण उनी प्लेयर अफ द म्याच घोषित भए।
दोस्रो क्वाटरफाइनल खेलमा भने शान्ति निकेतन विद्यालयले एकतर्फी प्रदर्शन गर्दै सनराइज विद्यालयलाई पराजित गर्यो। टस जितेर पहिले ब्याटिङ गरेको शान्ति निकेतनले निर्धारित २० ओभरमा १४३ रनको बलियो योगफल तयार गर्यो। टोलीका लागि महेश लावडले ३६ रन, इसान दौल्यालले ३३ रन तथा श्याम दौल्यालले २३ रनको महत्वपूर्ण योगदान दिए।
सनराइजका सुनिल चन्द्रले ४ विकेट र निरन्जन गिरीले २ विकेट लिए पनि शान्ति निकेतनको ब्याटिङलाई पूर्ण रूपमा रोक्न सकेनन्। निर्धारित लक्ष्य पछ्याउन मैदान उत्रिएको सनराइज टोली भने सुरुदेखि नै दबाबमा देखियो। शान्ति निकेतनका बलरहरूले आक्रामक र अनुशासित बलिङ गर्दै विपक्षी ब्याटरहरूलाई खुल्नै दिएनन्।
परिणामस्वरूप सनराइजको पूरा टोली केवल ८.५ ओभरमा ३४ रनमै समेटियो। टोलीका लागि सुशील चन्दले सर्वाधिक १५ रन बनाए पनि अन्य ब्याटरहरू दोहोरो अंकमा पुग्न सकेनन्।
शान्ति निकेतनको जितमा मनीष लेखक र इसान दौल्याल चम्किए। मनीषले ५ विकेट लिए भने इसानले ४ ओभरमा १२ रन खर्चेर ४ विकेट हात पारे। ब्याटिङमा ३३ रन र बलिङमा ४ विकेटसहित उत्कृष्ट अलराउण्ड प्रदर्शन गरेका इसान दौल्याल खेलका नायक बने र प्लेयर अफ द म्याच घोषित भए।
आजका दुवै खेलले प्रतियोगिताको रोमाञ्चकता अझ बढाएको छ। एकातिर होली फेम्लीले दबाबपूर्ण अवस्थामा संयमित खेल प्रदर्शन गर्दै अन्तिम विकेटसम्म पुगेको खेल जित्यो भने अर्कोतर्फ शान्ति निकेतनले सबै विभागमा उत्कृष्ट प्रदर्शन गर्दै उपाधि दाबेदारीलाई थप बलियो बनाएको छ।
प्रतियोगिताको सेमिफाइनल चरण अब झनै रोचक हुने अपेक्षा गरिएको छ। खेलप्रेमीहरूको उत्साहजनक उपस्थितिले मैदानमा थप ऊर्जा थपेको छ भने युवा खेलाडीहरूको प्रतिभा, अनुशासन र समर्पणले स्थानीय क्रिकेटको भविष्य उज्यालो रहेको संकेत दिएको छ। एन-७२० क्रिकेट प्रतियोगिता केवल प्रतिस्पर्धाको मंच मात्र नभई नयाँ प्रतिभा पहिचान गर्ने महत्वपूर्ण अवसरका रूपमा स्थापित हुँदै गएको देखिन्छ।
