धनगढी-धनगढीमा जारी दशौँ संस्करणको एसपिए लिटल फ्लावर प्राइड लिग सिनियर टी-२० क्रिकेट प्रतियोगिता अब रोमाञ्चक र निर्णायक मोडमा पुगेको छ। लिग चरणका प्रतिस्पर्धात्मक खेलहरू सकिएसँगै उपाधिका लागि चार टोलीले सेमिफाइनलमा स्थान सुरक्षित गरेका छन्। अब बुधबार हुने दुई सेमिफाइनलले उपाधि भिडन्तका लागि मैदानमा उत्रने दुई फाइनलिस्टको टुंगो लगाउनेछ।
लिग चरणमा उत्कृष्ट प्रदर्शन गर्दै समूह ‘ए’ बाट मर्निङ ग्लोरी स्कुल महेन्द्रनगर, समूह ‘बी’ बाट अनिरुद्ध जीडी ग्रुप धनगढी, समूह ‘सी’ बाट एरिष्टो माध्यमिक विद्यालय धनगढी र समूह ‘डी’ बाट घोडाघोडी सामुदायिक विद्यालय सेमिफाइनलमा पुगेका हुन्।
प्रतियोगिताको सुरुवातदेखि नै बलियो प्रदर्शन गर्दै आएका चारै टोलीका लागि अब हरेक बल, हरेक रन र हरेक विकेट महत्वपूर्ण बन्नेछ। लिग चरणमा देखाएको लयलाई कायम राख्दै फाइनलमा स्थान बनाउने लक्ष्यका साथ टोलीहरू निर्णायक खेलका लागि तयार छन्।
बुधबार बिहान ९ बजे पहिलो सेमिफाइनलमा मर्निङ ग्लोरी स्कुल महेन्द्रनगर र एरिष्टो माध्यमिक विद्यालय धनगढीबीच प्रतिस्पर्धा हुनेछ। लिग चरणमा प्रभावशाली प्रदर्शन गरेका दुवै टोली जित निकाल्दै उपाधिको अन्तिम यात्रामा प्रवेश गर्ने योजनामा छन्। पहिलो सेमिफाइनल जित्ने टोली बिहीबार हुने फाइनलको टिकट काट्नेछ।
यस्तै, बुधबार दिउँसो १ बजे दोस्रो सेमिफाइनलमा अनिरुद्ध जीडी ग्रुप धनगढी र घोडाघोडी सामुदायिक विद्यालय आमनेसामने हुनेछन्। दोस्रो सेमिफाइनल पनि दुई बलिया टोलीका लागि फाइनल प्रवेशको निर्णायक परीक्षा बन्नेछ। जित्ने टोलीले पहिलो सेमिफाइनलको विजेतासँग उपाधिका लागि भिड्नेछ।
असोज १५ गतेदेखि सुरु भएको प्रतियोगितामा देशभरका १५ टोलीले सहभागिता जनाएका थिए। विद्यालयस्तरका युवा खेलाडीलाई प्रतिस्पर्धात्मक क्रिकेटको मञ्च प्रदान गर्दै आएको प्रतियोगिताले नयाँ प्रतिभालाई आफ्नो क्षमता प्रदर्शन गर्ने अवसर दिनुका साथै सुदूरपश्चिममा क्रिकेटको विकास र खेलाडी उत्पादनमा समेत योगदान पुर्याउँदै आएको छ।
प्रतियोगिताको फाइनल खेल बिहीबार हुनेछ। उपाधि विजेताले नगद २ लाख रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले नगद १ लाख रुपैयाँसहित ट्रफी, मेडल र प्रमाणपत्र पाउनेछ। प्रतियोगितामा उत्कृष्ट प्रदर्शन गर्ने खेलाडीलाई विभिन्न विधागत पुरस्कारबाट समेत सम्मान गरिने आयोजकले जनाएको छ।
लिग चरणमा प्रतिस्पर्धा सकिए पनि प्रतियोगिताको वास्तविक रोमाञ्च अब सुरु हुँदैछ। चार टोली, दुई सेमिफाइनल र एउटा लक्ष्य-फाइनलको टिकट हुँदै उपाधिको ट्रफी उचाल्ने। बुधबारको मैदानले दुई फाइनलिस्टको टुंगो लगाउनेछ भने बिहीबारको भिडन्तले दशौँ संस्करणको च्याम्पियन तय गर्नेछ।
