क्रिमिया पुललाई लक्षित गरी युक्रेनबाट १ हजार ३३६ ड्रोन प्रहार

मस्को, कात्तिक ३० गते । युक्रेनले रुसको नियन्त्रणमा रहेको क्रिमिया पुललाई निशाना बनाउँदै एकै दिनमा एक हजार ३३६ ड्रोन प्रहार गरेको छ । आक्रमणबाट पुलमा ठूलो क्षति भएको नदेखिए पनि रुसी अधिकारीहरूले यातायात आवागमनमा प्रतिबन्ध लगाएका छन् ।

रुसको रक्षा मन्त्रालयका अनुसार यस वर्ष एकै दिनमा प्रक्षेपण गरिएका ड्रोनमध्ये यो दोस्रो ठूलो सङ्ख्या हो । क्रिमियाका रुसी नियुक्त गभर्नर सेर्गेई अक्सियोनोभले आक्रमणमा मानवीय क्षति भएको जानकारी नआएको बताउनुभएको छ । मस्कोका मेयर सर्गेई सोब्यानिनले राजधानीतर्फ आएका करिब ६०० ड्रोन रोकिएको जानकारी दिनुभएको छ ।

सन् २०२२ मा रुसले युक्रेनमाथि आक्रमण सुरु गरेयता क्रिमिया पुल युक्रेनको प्रमुख निशानामा पर्दै आएको छ । यसअघि सन् २०२२ अक्टोबरमा विस्फोटक पदार्थ बोकेको ट्रक पुलमा विस्फोट हुँदा महिनौँसम्म यातायात प्रभावित भएको थियो ।

युक्रेनले आफ्ना प्रत्याक्रमणलाई रुसी क्षेप्यास्त्र र ड्रोन आक्रमणको जवाफका रूपमा व्याख्या गर्दै आएको छ । किएभका अनुसार रुसी आक्रमणबाट युक्रेनी सहर र ऊर्जा पूर्वाधारमा क्षति पुग्नुका साथै सयौँ सर्वसाधारणको मृत्यु भएको र लाखौँ मानिस विद्युत् तथा ताप सुविधाबाट वञ्चित भएका छन् ।

युद्ध अन्त्यका लागि कूटनीतिक प्रयास जारी रहे पनि ठोस उपलब्धि हुन सकेको छैन । रुसी राष्ट्रपति भ्लादिमिर पुटिनले युक्रेनमा विदेशी सेना तैनाथ गरिए त्यसलाई युद्ध निरन्तरताका रूपमा लिने चेतावनी दिनुभएको छ । युक्रेनी राष्ट्रपति भोलोदिमिर जेलेन्स्कीले भने अमेरिकाले नेटो सदस्यताको प्रस्तावसँगै केही भूभाग छाड्न सुझाव दिएको बताउनुभएको छ ।

यसैबीच, चीनले नोभेम्बर १९ मा शेन्जेनमा राष्ट्रपति सी जिनपिङ, अमेरिकी राष्ट्रपति डोनाल्ड ट्रम्प र पुटिनबीच वार्ता हुने पुष्टि गरेको छ । बेइजिङले उक्त भेटमा विश्व शान्तिबारे छलफल हुने जनाएको छ । अमेरिकी अधिकारीहरूले भने त्रिपक्षीय वार्ताको मुख्य विषय युक्रेन युद्ध नहुने अपेक्षा गरेका छन् ।

जेलेन्स्कीले उक्त बैठकले सन् १९४५ को याल्टा सम्मेलनमा जस्तै ठूला शक्तिले साना देशको सहभागिताबिना उनीहरूको भविष्य निर्धारण गर्ने जोखिम रहेको चिन्ता व्यक्त गर्नुभएको छ ।

Leave a Reply

Your email address will not be published. Required fields are marked *