२८ फागुन धनगढी
शेर्पा सामुदायको नयाँ वर्ष अर्थात ग्याल्पो ल्होसार एक महिनाअघि नै मनाइसकेको नेपाल शेर्पा विद्यार्थी संघले जानकारी दिएको छ । ग्याल्पो ल्होसार गत माघ २७ गते मनाइएको संघले जानकारी दिएको हो ।
‘शेर्पा समुदायले आफ्नो ल्होसार सुरु हुनु एक महिना अघि नै आ–आफ्नो घर रङ्गाउने, सफा गर्ने र नयाँ लुगाफाटो किनी, आँगन अनि घरको छत लगायत गुम्बा अनि चैत्यहरूमा भएका पुराना लुग्दार र ध्वजाहरूलाई परिवर्तन गरि र सम्बोटा लिपिलाई सेतो पिठो प्रयोग गरि घरको खम्बा, भित्ता एवं दलिनमा टाँसी देलेकु भन्ने वाक्यांश र अष्ट मङ्गलका चिन्हहरूले घर सजाइ मनाइसकेको छ,’ संघले आफ्नो विज्ञप्तिमा भनेको छ ।
नेपाली पात्रोमा भने फाल्गुन २८ गते ग्याल्पो ल्होसार पारेकोमा संघले आपत्ति जनाएको छ । ‘भोटचन्द्र पात्रो अनुसार सम्बन्धित क्षेत्रको विज्ञलाई राखेर सहि तिथि मिती राखी पात्रो निर्माण गर्न नेपाल सरकारलाई बारम्बार अनुरोध गर्दा पनि सुधार हुन सकेन, जुन दुखद पक्ष हो,’ संघले भनेको छ ।
ग्याल्पो ल्होसारको मितिमा भएको त्रुटि सच्याउन संघको माग छ । साथै नेपाल सरकार संस्कृत, पर्यटन तथा नागरिक उड्डयन मन्त्रालय अन्तर्गतको पञ्चाङ्ग निर्णायक विकास समितिमा बौद्ध धर्म गुरु नियुक्ति गर्नका लागि संघले नेपाल सरकारसँग जोडदार माग गरेको छ ।
