२६ मङ्सिर धनगढी
नेपाल प्रिमियर लिग एनपीएल क्रिकेटको बुधबार जारी पहिलो खेलमा सुदूरपश्चिम रोयल्सले जनकपुर बोल्ट्सलाई जितका लागि एक सय २४ रनको लक्ष्य दिएको छ ।
कीर्तिपुरस्थित अन्तर्राष्ट्रिय क्रिकेट मैदानमा टस हारी ब्याटिङको निम्तो पाएको सुदूरपश्चिम रोयल्सले निर्धारित ओभरमा नौ विकेट गुमाएर एक सय २३ रन बनाएको हो ।
सुदूरपश्चिम रोयल्सका लागि ओपनर विनोद भण्डारीले ३३ रनको योगदान गरे । विकेटकिपर ब्याट्सम्यान विनोदले ३७ बलको सामना गरी एक छक्का र तीन चौका पनि हिर्काए ।
विनोद र सेफ अली जेबले ओपनिङ विकेटका लागि ५५ रनको साझेदारी गरे । सेफ अली जेबले पनि टोलीको खातामा २१ रन थपे । उनले २१ बलको सामना गरी दुई छक्का पनि हिर्काए ।
तेस्रो नम्बरमा क्रिज समाल्न आएका हरमित सिंह एक रनभन्दा अगाडि बढ्न सकेनन् । पाँचौँ नम्बरमा क्रिज समाल्न आएका कप्तान दीपेन्द्रसिंह ऐरीले खातासम्म खोल्न सकेनन् ।
दीपेन्द्रलाई जनकपुर बोल्ट्सका बलर अरनिको यादबले जोसुआ ट्रम्पद्वारा क्याच गराएका थिए । चौथो नम्बरका ब्याट्सम्यान ब्रान्डन म्याकमलेन पनि १७ बलमा ११ रन बनाउँदै पेभेलियन फर्किए ।
छैटौँ नम्बरमा क्रिज समाल्न आएका इशान पाण्डेले टोलीको खातामा १७ रन थपे । उनले १४ बलमा एक छक्का र एक चौका पनि प्रहार गरे । आरिफ शेखले ६ रन बनाउँदै पेभेलियन फर्किए ।
यसैगरी, स्कट कुगेलियन तीन बलमा एक छक्काको मद्दतले सात रन बनाउँदै आउट भए । नरेन साउदले तीन रन बनाए । नरेश बुढाऐर नौ र अविनाष बोहरा दुई रनमा अविजित रहे । सुदूरपश्चिम रोयल्सले अतिरिक्त रुपमा पनि १३ रन पायो ।
जनकपुर बोल्ट्सका बलर किशोर महतोले चार विकेट लिए । उनले चार ओभरमा ३५ रन खर्चिए । शेर मल्ल र अरनिको यादबले पनि दुई–दुई विकेट हात पारे । हर्ष थाकेरले एक विकेट लिए ।
जारी प्रतियोगितामा जनकपुर बोल्ट्स र सुदूरपश्चिम रोयल्सले आफ्नो पाँचौँ खेल खेलिरहेका हुन् । जनकपुर बोल्ट्सले यसअघि खेलिएको चारवटै खेलमा जित हात पारेको छ ।
जनकपुर बोल्ट्स आठ अंकसहित तालिकाको पहिलो स्थानमा आसिन छ । सुदूरपश्चिम रोयल्सले भने यसअघि आफूले खेलेको चारमध्ये तीन खेलमा जित हात पारेको छ भने एक खेलमा हार भोगेको छ ।
सुदूरपश्चिम रोयल्स ६ अंकसहित तालिकाको दोस्रो स्थानमा छ । पाँच खेलबाट ६ अंक जोडेको चितवन राइनोज तेस्रो र समान खेलबाट समान अंक जोडेको कर्णाली याक्स चौथो स्थानमा आसिन छन् ।
पाँच खेलबाट दुई अंक बटुलेको लुम्बिनी लायन्स पाँचौँ, तीन खेलबाट दुई अंक जोडेको काठमाडौँ गुर्खाज छैटौँ, चार खेलबाट दुई अंक हात पारेको पोखरा एभेन्जर्स सातौँ र चार खेलबाट दुई अंक हात पारेको विराटनगर किङ्स आठौँ स्थानमा छन् ।
