कृष्णपुर नगरपालिका ९ राजघाटमा सिकलसेल एनिमिया शिविर संचालन

मनिसा सुनार
२१ पुस २०८१
कञ्चनपुर- कृष्णपुर नगरपालिका वडा नम्बर ९ राजघाट स्वास्थ्य चौकीको भवनमा आइतबार सिकलसेल एनिमियाको नि:शुल्क शिविर संचालन भएको छ । कृष्णपुर नगरपालिकाको आयोजनामा सञ्चालन भएको शिविरमा छ सय १२ जनाले सेवा लिएका थिए । निःशुल्क स्वास्थ्य शिविरमा ५० जनामा सिकलसेल एनिमिया पोजेटिभ देखिएको निमेष सामुदायिक अस्पतालका संचालक डाक्टर फुलराम चौधरीले
जानकारी गराए । शिविरको कृष्णपुर नगरपालिकाका नगर प्रमुख हेमराज ओझाले उद्घाटन गरेका थिए । सो अवसरमा नगर प्रमुख ओझाले थारू समुदायमा देखिएको सिकसेल एनिमिया निवारणका लागि समुदायमा व्यापक जनचेतना अभिबृद्धि गर्न आवश्यक रहेको बताए ।

उनले सिकसेल एनिमिया रोग पहिचानका लागि आगामी नगरपालिकाले आउँदो आर्थिक वर्षमा ९ वटै वडामा प्राथमिक उपचारका आवश्यक उपकरणको व्यवस्था गरिने जानकारी गराए । कृष्णपुर ९ का वडा अध्यक्ष कैलाश बलायरको अध्यक्षतामा भएको कार्यक्रममा नगर प्रमुख हेमराज ओझा निमेष सामुदायिक अस्पताल तथा सिकलसेल अनुसन्धान केन्द्र गुलरियाका संचालक डाक्टर फुलराम चौधरी कृष्णपुर नगरपालिका स्वास्थ्य शाखा प्रमुख रतन बिष्ट, स्वास्थ्य सहयोगी विराज ब. कुवर स्वास्थ्य कर्मचारी लगायतको उपस्थिति र सहयोगमा सम्पन्न भएको थियोे ।