धनगढी, २१ माघ
मानवसेवा आश्रमद्वारा धनगढीको सौराइ पार्टी प्यालेसमा आश्रमले साङ्लोमा बाँधिएका मानवहरूको कथा समेटिएको वृत्तचित्र प्रस्तुत गरिएको छ ।
आइतबार सहयोगापेक्षी सडकआश्रित मानवमुक्त देश नेपाल निर्माण र मानवता प्रवर्धनको लक्ष्य राखेर तयार पारेको मरेर पनि बाँचिरहेका र बाँचेर पनि मरिरहेकाहरूको कथा ‘साङ्लो’ शीर्षकको वृत्तचित्र प्रस्तुत गरिएको हो । उक्त वृत्तचित्र हेर्न आएका धेरैजसो दर्शकहरूका आँखामा आँसु थियो ।
कार्यक्रममा ४ सयभन्दा बढीको उपस्थिति रहेको थियो । धनगढी उपमहानगरपालिका भित्र रहेका टोल विकास समिति, टोलका सरसफाइ समिति, शैक्षिक व्यक्तित्व, स्वयंसेवक, व्यापारी, बुद्धिजीवी, आमा समूह, धार्मिक तथा आध्यात्मिक क्षेत्रमा रहेका व्यक्ति तथा स्थानीय तहका कर्मचारी जनप्रतिनिधिहरूको सहभागिता रहेको थियो ।
कार्यक्रममा मानवसेवा आश्रमका संस्थापक तथा केन्द्रीय अध्यक्ष रामजी अधिकारीले प्रेरणात्मक प्रस्तुति राखेका थिए । उनले आश्रमले माघ २३ गतेदेखि सञ्चालन गर्न लागेको महायज्ञको उद्देश्यबारे पनि कार्यक्रममा प्रस्ट पारेका थिए ।
महायज्ञ सुरू नहुँदै दान गर्ने क्रम सुरू
धनगढी १५ उर्मीमा बन्दै गरेको आश्रमको भवन निर्माणका लागि हुन लागेको महायज्ञ लक्षित गरी दाताहरूले महायज्ञ सुरु नहुँदै दान गर्न थालेका छन् । मानवसेवाको यो पवित्र कार्यका लागि धनगढीस्थित चैतन्य पाठशालाबाट १ लाख १ हजार रुपैयाँ, नवजीवन सहकारी संस्था लिमिटेडले अक्षयकोष निर्माणका लागि १ लाख ११ हजार १ सय ११ रुपैयाँ प्रदान गरेका छ ।
त्यस्तै लायन्स क्लब अफ नैनादेवी धनगढीले ५१ हजार रुपैयाँ, केदारदत्त भट्टले आजीवन भोजनसेवा योगदानको लागि १ लाख ११ हजार १ सय रुपैयाँ र व्यवसायी नरेशबहादुर कुँवरले ५१ हजार रुपैयाँ योगदान गरेको जनाइएको छ । मानवसेवा आश्रमले माघ २३ गते देखि ३० गते सम्म महोत्सवस्थल धनगढीमा श्रीमद् भागवत सप्ताह ज्ञानविज्ञान महायज्ञ आयोजना गर्दैछ ।
आश्रमले महायज्ञ अर्थ संकलनको प्रयोजनका लागिमात्र नभई मानवता र सदभावनाका लागि पनि विविभ कार्यक्रम सहित महायज्ञ आयोजना गरेको जनाएको छ । सोमबार एसटिएस चलचित्रहलमा समेत प्रदेश प्रमुख, नगरप्रमुख, सूरक्षा प्रमुख, राष्ट्रसेवक कर्मचारी र साहित्यकार र पत्रकारहरुका बिच साँझ ४ बजे वृत्तचित्र साङ्लो प्रस्तुत गरिँदै छ ।
मानवसेवा आश्रम खुला आकाशमुनि सडक पेटी एवं सार्वजनिक स्थलहरूमा कष्टपूर्ण जीवनयापन गर्न विवश सहयोगापेक्षी, बेसहारा, असहाय, अशक्त, अभिभावकविहीन, शारीरिक तथा मानसिकरुपमा कमजोर मानवहरूको उद्धार, उपचार, पालनपोषण, संरक्षण एवं पारिवारिक पुनर्मिलनको सेवामा समर्पित रहेको आयोजकले जनाएको छ । आश्रमको विसं २०६९ साल भाद्र १३ गते मुख्य कार्यालय मकवानपुर, हेटौँडाबाट औपचारिक रूपमा सेवा शुभारम्भ भएको हो ।
आश्रमले विसं २०८२ भित्र स्वयं आफ्नो लागि आफै केही गर्न नसक्ने अवस्थामा रहेका, हेरचाह र पालनपोषण गरिदिने समेत कोही नभएका सहयोगापेक्षी (बेसहारा, असहाय, अशक्त, अभिभावकविहीन, मानसिक तथा शारीरिकरुपमा अति कमजोर) सडकआश्रित मानवमुक्त राष्ट्र नेपाल निर्माण गर्ने, घोषणा गरेको छ । घोषणा पश्चातको कार्यान्वयनलाई प्रभावकारी बनाउने संकल्प सहित हाल सात प्रदेशको २० जिल्लामा २६ ओटा सेवा केन्द्रहरूमार्फत ७७ वटै जिल्ला र विदेशमा बेलायत, कतार, अष्ट्रेलियामा सहयोगापेक्षी सडकआश्रित मानवहरूको उद्धार र तिनीहरूको मानवोचित व्यवस्थापन गर्दै आइरहेको छ ।
